Samanburður vorhreta

Hefur þetta gerst áður er spurning sem ég heyri í kring um mig þessa dagana og er þá vísað  í kuldann vetrarríkið fyrir norðan og austan. Svarið er vitanlega já, viðlíka hret hefur oft gert áður !

Hins vegar er ekki alltaf auðvelt að bera þau saman. Á að horfa til þess hversu kalt verður eða hvort og hve víða það snjóar ? Verður kannski fannfergi á skömmum tíma, eftirminnileg ófærð o.s.frv ? Einnig skiptir máli hvenær vorsins eða jafnvel sumarsins kalda loftið úr norðri steypist yfir okkur. Svo verður að hafa í huga að fólk setur hugtakið hret oft í samhengi við tíðina næstu vikurnar á undan. Hafi verið kominn gróður og ilmur af sumri, þykir hretið kannski sérlega slæmt, þó svo að það hafi í raun verið heldur ómerkilegt. Að sama skapi þegar vorkoman er óvenju sein, þykja frostakaflar um miðjan maí varla til frásagnar. Slík tíð að vori er sem betur fer fátíð hin síðari árin. Svona mætti halda áfram.

En þá að samanburðinum. Í fyrsta lagi skulum við hafa það í huga að maí síðustu þrjú árin hafa að mestu verið lausir við vorhret.  Vorkoman þótti þessi árin góð og tíð hagfelld, ólíkt því sem það var næstu árin á undan. 2007 var hreinlega kalt fyrir þennan árstíma og 2006 gerði eftirminnilegt hret a.m.k. í huga Norðlendinga þegar snjóaði sums staðar reiðinnar býsn í kring um 22. maí. Hretið 2006 var klárlega meira en nú ef við horfum til loftmassans úr norðri, kulda hans og umfang. Þá gekk kaldasta loftið hratt suður yfir og í kjölfarið hlýnaði (annað og minna kuldakast reyndar nokkrum dögum síðar). Margvíslegan sögulegan fróðleik og samanburð af kuldum í maí má sjá á nimbusi Sigurðar Þórs.

http://nimbus.blog.is/blog/nimbus/entry/1160653/   (tengin við hlekk virkaði ekki sem skyldi)

Nú aftur á móti er að sjá að þessi kalda tíð teygi sig yfir lengri tíma, eða í það minnsta 4 til 5 sólarhringa. Hámarkið verður ef af líkum lætur á laugardag. Oft koma viðburðir eins og þessi í lotum, þ.e. þeir endurtaka sig í tvö og jafnvel þrjú eða fjögur skipti með áþekkum einkennum. Ég er ekki að segja að svo þurfi á verða nú, einfaldlega að lýsa því hvernig veðráttan á það til að haga sér í takt við orðtakið gamalkunnuga að sjaldan sé ein báran stök !

Kortið er spákort af Brunni Veðurstofunnar og gildir á laugardag kl. 00 um það bil sem kaldasti kjarninn verður að renna hjá.  Litaskalinn sýnir hita í hæð ( í 850 hPa) og línurnar eru svokölluð þykkt en hún er vísitala hita loftmassans.  

Athugasemdir

[Sigurður Þór Guðjónsson, 19.5.2011 kl. 21:40]

Tenging: http://nimbus.blog.is/blog/nimbus/entry/1160653/

[Einar Sveinbjörnsson, 19.5.2011 kl. 22:21]

Takk Sigurður ! Er með nýjan vafra og sumt í bloggumhverfi mbl.is ekki eins og áður.

ESv

[Björn Fr. Jónasson (IP-tala skráð) 20.5.2011 kl. 09:15]

Þessi kuldapollur norð-vestur af Grænlandi er orðin ansi hvimleiður, enda hefur hann hrellt okkur síðan um miðjan feb.  Þetta er farið að minna á veðráttuna árið 1979 sem að vísu var nokkuð kaldara ár.

Mjög mikið hefur verið um hvassviðri undanfarið og veðrið hefur verið svalt.  Gróður virðist vera í seinna lagi í ár.  Er kominn á þá skoðun að veðrið verði með lakast móti nú þetta árið.  Etv. svipað og árið 1981.

En eins og fram kemur, þá eru vorhret í maí ekki óalgeng.  Nefni hér nokkur sem ég man eftir hin síðari ár, og hvernig sumarið var þar á eftir:

• Maí 1979 var kaldur nær allan mánuðinn.  Sumarið þar á eftir var líka kalt.
• Maí 1986 var kaldur hér sunnalands, en votur norð-austanlands.  Sumarið var aftur á móti hlýtt og sólríkt
• Maí 1989 var svalur víðast hvar, en sumarið var með besta móti norðan og autan lands.
• Maí 1991 val kaldur með þrálátum norðanáttum, en lok mánaðarins snérist þetta við og hlýnaði skyndilega með sól og blíðu sem hélst nær allt sumarið sem var eitt hið sólríkasta og hlýjasta í manna minnum.
• Maí 2004 var kaldur, en sumarið þar á eftir var með betra móti
• Maí 2005 var líka kaldur, en sumarið þar á eftir var ekkert sérstakt, frekar sólarlítið.

Man einhver eftir örðum köldum maí-mánuðum og hvernig sumarið var á eftir þeim?

[Emil Hannes Valgeirsson, 20.5.2011 kl. 13:01]

Hvað segja bændur nú?

Annars er þessi maí nokkuð svipaður 2006 með hlýindum fyrri hlutann og kuldatíð seinni hlutann. Sumarið 2006 var frekar þungbúið framan af suðvestanlands en rættist úr því seinni hlutann.

Kuldinn hefur ekki náð sér sér á strik hér í Reykjavík ennþá, það er varla hægt að kvarta yfir sól og átta stiga hita eins og er í dag.

En Einar. Varðandi netvafra, þá eru þeir mishentugir fyrir bloggið. Safari virðist eiga erfitt með linka og myndir en Firefox hentar þar mun betur.