Greinileg og samfelld gosmóska fyrir sunnan land á tunglmynd

Ingibjörg Jónsdóttir á Jarðvísindastofnun HÍ miðlar hverri myndinni á fætur annarri til okkar. Þessi sem hér sést var tekin fyrr í dag (23. maí) og ættuð úr smiðju Dundee. Lægðasnúður er yfir norðanverðum Bretlandseyjum og svona eins og í mótsögn við fegurðina birtist ljótleikinn í gosstróknum sem nær langt á haf út suður af landinu og ógreinilegri taumur þaðan til suðvesturs. 

Suðurströndin er að mestu hulin skýjum og uppi í horninu sést í sjóinn fyrir vestan landið. Gosmökkurinn er nokkuð samfelldur nokkra tugi kílómetra suður fyrir landið í þeirri NNA-átt sem er á þessum slóðum.

Athugasemdir

[Ingibjörg Jónsdóttir (IP-tala skráð) 23.5.2011 kl. 19:23]

Veit ekki hvort það er hægt að kalla þetta gosmökk, er þetta ekki mest fok? Náði um 800 km frá gosstöðvunum. Kær kveðja og takk fyrir góða umfjöllun.

[Einar Sveinbjörnsson, 23.5.2011 kl. 20:10]

Sennilega er það rétt Inga ! Í hvassri NNA-áttinni berst vitanlega mikið fokefni af landi í bland við ösku beint frá gosstöðvunum. Við kynntumst því líka í Eyjafjallajökulsgosinu hvernig hvass vindur var þess megnugur að keyra mökkinn niður. En auðvitað blandast þetta allt saman eins og við þekkjum í venjulegu hríðarkófi. Hvað er þá ofankoma og hvað skafrenningur ??

ESv