Sjaldan er ein báran stök !

Það er eins og flestir neikvæðir þættir náttúrunnar leggist á eitt í því að gera okkur lífið leitt. Ekki þarf að orðlengja frekar  eldgosið og alvarlegar afleiðingar þess suðaustanlands, frá Eyjafjöllum austur í Öræfasveit.

En á sama tíma gengur yfir eitt það leiðinglegasta og erfiðasta vorhret síðari ára norðaustanlands með fannfergi, sérstaklega fjallvegum. Í byggð ill séð krapahríð sem getur farið illa í búsmala og fugla.  Ofanhríðin í gær norðaustanlands var það mikil að víða hafði ekki undan með snjómokstur og enn er beðið með mokstur.  Frá Vopanfirði hafa þannig allar þrjár leiðirnar lokast. Hellisheiðin reyndar strax í upphafi þessa kuldakafla (eftir að hafa verið opnuð óvenju snemma í ár !). Sandvíkurheiðin til norðurs er ófær og tengingin við hringveginn um Vopnafjarðarheiði hefur verið úti frá því í fyrradag að ég held. 

Mjög sviptivindasamt hefur síðan verið suðaustanlands á þekktu svæði viða þessa aðstæður, frá Suðursveit austur í Berufjörð. Ökutæki hafa skemmst og vegurinn er þegar þetta er skrifað k. 09:15 enn lokaður vegna vinds.  Ekki furða þar sem hviður hafa slagað yfir 60 m/s á mæli og meðalvindur á Höfn er um 30 m/s !

Ástandið er vægast sagt mjög óvenjulegt, sérstaklega ef árstíminn er tekinn með í reikninginn, þó svo að gosið geti hvenær sem árs.  En hringvegurinn hefur lokast samtímis um austanvert landið af þremur ólíkum orsökum:  

 

• a.  Sunnanlands frá Vík og austur í Öræfasveit vegna öskubyls.
• b.  Suðaustanlands úr Suðursveit á Djúpavog vegna sviptivinda.
• c.  Um Möðrudalsöræfi er þjóðvegurinn ófær þó ekki sé hann formlega lokaður.   

 

Athugasemdir

[Björn Fr. Jónasson (IP-tala skráð) 24.5.2011 kl. 10:37]

Veðrir núna er farið að minna óþægilega mikið á veðrið eins og það var árið 1979.

Mér segist líka hugur að sumarið í ár verði ekkert sérstakt, því hér virðast vera langtímaveðrakerfi sem ráðið hafa og ráða munu ríkjum næstu mánuði. 
Mér þykir því ólíklegt að mikið breytist til batnaðar næstu mánuði þó að örlítið hlýni kannski.

Ef ég man rétt, þá var sumarið 1979 ekkert sérstakt, svalt, sólarlítið og stutt.

Það skildi þá ekki vera að sumarið í ár verði eitthvað svipað.

Ps. hvað varð um alheimshlýindin sem alltaf var verið að hræða okkur með?

[Einar Sveinbjörnsson, 24.5.2011 kl. 11:41]

Ekki vera of svartsýnn Björn !

Þó kalt sé nú var miklu kaldara í maí 1979. Gleymum ekki þessum tveimur mjög svo hegfelldu vikum sem við fengum framan af mánuðinum:)

Og óþarfi að geta sér til um sumarið í heild sinni út frá þessu vikuhreti. En vissulega útlit fyrir frekar svalt veður áfram, hugsanlega eitthvað fram yfir mánaðarmótin.

ESv

[Sigurður Þór Guðjónsson, 24.5.2011 kl. 12:15]

Fróðlegt væri nú að fá skýringar á því hvers vegna snjóar og rignir svona mikið austanlands. Ekki finnst mér nú hægt að jafna þessu hreti saman við hryllinginn 1979 sem var reyndar farinn að skána einmitt um þetta leyti mánaðarins. En síðustu dagarnir 1949 voru ansi slæmir enda var landið nýgengið í NATÓ! En bæði 1949 og 1979 voru allir mánuðurnir að heita má kaldir en þetta hefur staðið í stuttan tíma og hefur aldrei jafnast á við 1949 og 1979. Meðalhitinn á Akureyri er t.d. enn yfir meðallagi og þar er enginn snjór.  Svo má eki gleyma júní 1952 þegar festi snjó í Vestmannaeyjum! En annars finnst manni að einhver breyting sé að verða í vetur og vor frá þeim fasa sem lengi hefur verið en það er kannski bara tóm vitleysa.

[Björn Fr. Jónasson (IP-tala skráð) 24.5.2011 kl. 13:45]

Já, það er rétt hjá þér, Sigurður.  Það hefur orðið breyting á þeim fasa sem lengi hefur verið.
Þetta hófst allt saman kringum 20. okt. í fyrra, en þá varð einskonar kerfisskipti í veðrinu hérna.  Það hafði nefnliega verið ansi hlýtt og frekar stillt veður í langan tíma, amk. eitt-og-hálft ár þar á undan.

Síðan í lok okt. á síðastu ári hefur verið mikið um hvassviðri og almennt séð hefur andrúmsloftið hér á landi verið kaldara en við höfum átt að venjast undanfarin ár.

Kannski að Einar Sveinbjörns viti meira um þetta og hafi einhverja skýringu á þessu?

En hvað um það, mér finnst að tónninn hafi verið settur fyrir komandi sumar.  Sumarið 2011 verður frekar svalt og sólarlítið, spái ég, og það mun hausta snemma í ár.

[Þorkell Guðbrandsson (IP-tala skráð) 25.5.2011 kl. 11:26]

Það er alltaf gaman að spám, hvort sem þeir koma frá Veðurklúbbnum á Dalvík eða einhverjum öðrum. Spárnar segja oft meira um spámanninn en veðurhorfurnar! - En eftir því sem lesa má út úr fróðleikspistlum (hungurdiskum) Trausta Jónssonar stafar kuldinn undanfarið að stórum hluta af því að fyrirstöðuhæð er yfir austanverðu Kanada og Alaska sem leiðir af sér að kuldapollur myndast yfir Baffinslandi og hafinu vestan Grænlands. Einnig hefur kuldapollur yfir norðanverðu Barentshafi sent afkvæmi sín til móts við gusurnar frá kuldapollinum vestan Grænlands (sem Trausti kallar því skemmtilega nafni Stóra-Bola) og þær hafa stundum sameinast í að gera okkur lífið leitt. Í þann flokk fer hretið nú í vikunni, ef ég skil skýringar Trausta rétt. Annars er óhætt að benda veðuráhugafólki á greinar Trausta, ef það les þær ekki þegar. Þær eru alls ekki ætlaðar sem spár, heldur er Trausti að skýra út fyrir fólki eðli veðurkerfanna og hvaða þættir móta þau. Trausti skýrir þetta út í liprum og skýrum texta, sem hverjum manni er ætlandi að skilja.

[Þorkell Guðbrandsson (IP-tala skráð) 25.5.2011 kl. 20:34]

Ég rak augun í "pennaglöp" hjá mér þarna ofar, fyrirstöðuhæðin er að sjálfsögðu yfir vestanverðu norður-Kanada og Alaska.