Sveiflukenndur maí, en yfir meðallagi

Merkilegt nokk þá virðist þessi maímánuður ekki ætla að marka nein sérstök spor í veðurfarssögunni. Þrátt fyrir alvöru kuldakast í yfir vikutíma eftir miðjan mánuðinn verður hitinn yfir meðallagi víðast hvar á landinu (kannski síst um norðvestanvert landið).  Þökk sé hagstæðari tíð framan af eða frá um 2. maí fram yfir þ. 15.  Ef sá góði kafli hefði ekki komið væri mánuðirinn að öllum líkindum í slöku meðallagi. 

Í Reykjavík stefnir í um 0,5°C yfir meðallag mánaðrins og á Akureyri um 1,0°C yfir maímeðaltalinu 1961-1990.  Ágætt það.  Það sem vekur kannski meiri athygli er úrkoman, en þegar dagur er eftir í mælingum hefur hún reynst vera meiri á Akureyri en í Reykjavík.  55 mm (tvöföld) á móti 53 mm í Rvk. En það sem meira er að um helmingur mánaðarúrkomunnar í Reykjavík féll fyrsta daginn (25 mm að morgni 1. maí)  og þótti það ansi mikið.   Sumir eru e.t.b. nú þegar búnir að gleyma lausamjöllinni í Höfuðborginni að morgni þess dags. Hann féll reyndar að miklu leyti fyrir miðnætti, þ.e. í apríl, en telst samt til maí skv. reglunum um skiptingar á milli mánaða í úrkomu. 

Á Akureyri kom megnið af úrkomunni hins vegar í þremur slumpum um miðbik maí mánaðar. 

Athugasemdir

[Brynjólfur Fr. Leifsson (IP-tala skráð) 31.5.2011 kl. 18:34]

Skrýtið.  Hvernig er þá verulega kaldur maí ef þessi sem er að líða er svona í góðu meðallagi?

Annars er veðrir búið að vera afspyrnu leiðinlegt þennan maí-mánuð.  Sjaldan sem hægt hefur verið að tala um góðviðrisdaga.

Þessi maí sem er að líða er mjög frábrugðin hinum mildu maí-mánuðum sem við upplifðum árin 2009-2010.  Það er greinilegt að það hefur orðið algjört kerfisskipti í veðráttunni hér á landi nýliðin vetur og allt eins má búast við veðurfarslega leiðinlegu sumri því ríkjandi veðurkerfi býður vart upp á annað.  Hér á ég við veðurkerfið með kuldapollunum sem berast í óendanlegum straumum vestan að sem eiga ættir sínar að rekja frá nyrsta hluta Kanada.  

[Sigurður Þór Guðjónsson, 31.5.2011 kl. 20:14]

Þessari spurningu, hvernig sé verulega kaldur maí, að bara fremur kaldur maí, ætti hver maður að geta sagt sér sjálfur sem kominn er eithvað til ára sinna því hann hefur lifað þó nokkra slíka. 

[Óskar J. Sigurðsson (IP-tala skráð) 1.6.2011 kl. 20:46]

Eitthvað brogað við kvikasilfurshámarksmælinn úti á Veðurstofutúni þessa dagana. Í gær 31. maí var hámark dagsins á mannaðri stöð 12,5 stig en á þeirri sjálfvirku 9,8 stig. í dag 1. júní voru samsvarandi tölur 15,1 og 12,4 stig.

[Sigurður Þór Guðjónsson, 2.6.2011 kl. 15:52]

Rétt hjá Óskari. Hef verið að furða mig á þessu.