Komið í Nesbyen

Ég hef verið á ferðalagi um Noreg síðustu vikuna eða svo.  Á ferð um Hallingdal norðvestur af Osló gat ég ekki látið hjá líðast að koma við í Nesbyen.  Sá staður er fyrir Norðmenn eins og Teigarhorn okkar Íslendinga, því Nesbyen á hitametið í Noregi sem er 35,6°C.  Sá hiti mældist 20. júní 1970 í sannkallaðri hitabylgju sem um það leyti ríkti um sunnanverða Skandinavíu, einnig í Danmörku og suður um Þýskaland.  Takið eftir að líkt og hjá okkur er metið norska sett um það leyti sem sól er hæst á lofti og dagurinn lengstur.  Sama átti við á Teigarhorni 1939 þegar hitinn þar mældist 30,5°C.  Þetta með sólarhæðina skiptir máli, því allt þarf helst að leggjast saman fyrir landsmet af þessum toga.  Þannig dugar sjaldnast það eitt til að hafa mjög hlýjan loftmassa og hagstæða vindátt.  Meira þarf til.

Eins og sést á myndinni hefur byggðasafnið í Nesbyen stillt upp hitamælaskýlinu þar sem hitinn var mældur þennan júnúdag fyrir meira en 40 árum framan við safnið.  Þrátt fyrir talsverða leit tókst mér ekki að finna veðurstöðina í þessum fallega bæ, sem einkennist svo af meginlandsloftslagi. Hæsti hiti dagsins mælist ekki svo ósjaldan i Nesbyen að sumrinu, en þar er líka stillt og kalt á veturna.  Lægsti mældi hitinn er -38,0°C.  Sú tala er okkur kunnugleg í samhengi kuldmeta hér á landi !

Þess má geta að Íslendingafélagið í Osló á snoturt hús um 30 km neðar í Hallingdal, við Norefjell (í austurjaðrinum á kortinu að ofan). Þar er einnig ágætis skíðasvæði á vetrum. 

   

Athugasemdir

[Benedikt R. Magnús (IP-tala skráð) 6.6.2011 kl. 12:37]

Var ekki sumarið 1970 með þeim kaldari á Íslandi ef ég man rétt.

Þá um Hvítasunnuna gerði norðanbál sem varð m.a. þess valdandi að 4 urðu úti á Fimmvörðuhálsi.

Júlí það árið var með þeim kaldari og t.d. gerði norðanbál kringum 9. júlí sem leiddi til þess að Hollenskir ferðamenn urðu að flýja af tjaldstæðinu á Þingvöllum þá um nóttina og leita sér gistingar í Hótel Valhöll. 
Illu heilli varð þetta til þess að þeir urðu þeir fyrstu sem urðu varir við að kviknað var í ráðherrabústaðnum þar, en þar fórust Bjarni Benediktsson forsætisráðherra, kona hans og dóttursonur.

Þetta sumar komu Led Zeppelin til landsins og spiluðu í Laugardaslhöllinni á Lystahátíð það árið.  Í bók um hljómsveitina las ég að þeim leiddist mjög hér og fannst lítið við að vera.  Sennilega hefur slæmt veður spilað þarna inn í.

Ekki bætti úr skák að Verslunarmannahelgin það árið 1970 var með eindæmum blaut og köld.

Það er greinilega fylgni á milli hitasumars í Skandínavíu og kuldatíðar hér á landi eins og nú.