Alls enginn sumarhiti !

Yfir okkur er þrálátur og leiðinda kuldi.  Illa gengur að losna við þennan kalda kjarna háloftanna sem hringsólað hefur við landið undanfarna daga og vikur. 

Í dag var frostmarkshæðin samkvæmt mælingu yfir Keflavík um 650 metrar eða svipuð og að undanförnu. Sterk júnísólin nær vart að hita loftið við yfrborð meira en sem nemur 10°C þegar best lætur og í Heiðmörk síðdegis gerði meira að segja smáél.  Nú í kvöld sýnir mælir á Fjarðarheiðinni fyrir austan -4°C og það í vel blönduðu lofti (ekki hitahvarf við jörðu) !.

En hvænær linnir þessu ?  Lofthitinn kemur ekki til með að hækka fyrr en frostmarkshæðin kemst upp fyrir 1.000 metra hæð og helst upp í um 1.300 til 1.400 metra hæð.  Reiknaðar veðurspár gera ekki ráð fyrir slíku næstu dagana.  Að vísu sækir að okkur mildara loft úr flestum áttum undir helgi, meira að segja úr norðaustri.  Á meðan Evrópska spáin (ECMWF) gerir ráð fyrir því að það nái að hlýna nokkuð á sunnudag (12. júní) með A-átt, reiknar sú Bandaríska (GFS) með því að það milda loft fari hjá fyrir norðan land og við sitjum áfram í svalanum a.m.k. vel fram í næstu viku. 

Reikningar daglegu veðurspánna eru talsvert óstöðugir um þessar mundir.  Nokkuð var látið með spá um góðviðri og miklar breytingar nú fyrir helgi og gengu þær ekki eftir.  Það er eins og sæki sífellt í sama farið.  Slíkt er líka háttalag veðráttunnar að viðhalda ákveðnu veðurlagi þar til truflun í bylgjurófi háloftarastarinnar kollvarpar ástandinu og færir okkur breytt veðurlag.  Í dag er fátt sem bendir til þess að þess háttar bylgjubrot eða bylgjuvíxl sé yfirvofandi næstu dagana. 

Spákortið gildir á fimmtudag (9. júní) kl. 12 og er spá EcMWF. Fengið af vef wetterzentrale.de 

Athugasemdir

[Kristinn Magg. (IP-tala skráð) 7.6.2011 kl. 10:57]

Langtímaspár gera ráð fyrir köldu veðri hér næstu daga langt fram í næstu viku.  Sennilega fögnum við 17. júní í vetrargallanum.

Vegna þessa ástands sem ríkt hefur undanfarnar vikur eða öllu heldur mánuði, tel ég að sumarið 2011 verða svalt, vindasamt og sólarlítið. 
Þetta er bara staðreynd enda styðja dæmi um þetta frá fyrri tíð þar sem að kalt vor kallar á kalt sumar.

Einnig má búast við það að haustið 2011 verði risjótt og að veturinn 2011-2012 verði kaldur og snjóþungur.

Við höfum dæmi um svipað ástand frá fyrri tíð t.d. árið 1973-1974.  Veðurmynsstrið nú er alveg eins og árið 1973.

Þetta er alavegan mín tilgáta.

[Jóhann Grétar Kröyer Gizurarson (IP-tala skráð) 7.6.2011 kl. 16:12]

Það eru þrennir þættir sem ég ætla að nota til að hrekja bölsýnisspár Kristins Magg:

1) Sjávarhiti hefur aldrei verið hærri a.m.k. ekki frá landnámi. Í gamla daga kom það í fréttum ef makríll veiddist í net, en nú mokveiðum við honum. Það er beint samband hitafars og sjávarhita á eylöndum líkt og Íslandi.

2) Enginn hafís hefur verið hér við land frá skítavorinu 1979.

3) Magn CO2 (koltvísýrings) hefur bara aukist í andrúmsloftinu. Árið 1975 var magnið ca. 330 ppm en er komið hátt í 390 ppm, þannig að síðustu sumur hafa verið hlýrri en góðu sumrin frá c.a. 1925-1965.

Vorið var ekki kalt, þó svo að það hafi verið undir meðallagi víða Norðanlands í Maí. Apríl var einn sá hlýjasti sem komið hefur Austanlands. Allir hafa gleymt gríðarlegri sumarblíðu fyrstu 2 vikurnar í Maí í reykjavík þar sem í 7 daga fór hitinn í eða yfir 15 C°. Það er eins og fólk muni bara leiðinlegt veður en ekki gott!

[Guðmundur Sævin Bjarnason (IP-tala skráð) 7.6.2011 kl. 21:45]

Mín spurning er, hver vegna er frostmarkshæðin svona lág núna?

[Einar Sveinbjörnsson, 7.6.2011 kl. 23:28]

Frostmarkshæðin helst í hendur við hitagæði loftins ef svo má segja. Þegar loftið yfir landinu er kalt á þessum árstíma er frostmarkshæðin lág. Skiptir þá litlu þó svo að sólin nái að verma yfirborðið yfir miðjan daginn. Ástæða lágrar frostmarkshæðar nú er einfaldlega sú að uppruni loftins er frá norðlægari og kaldari svæðum. Varmi sem streymir upp við hlýnun sólar leiðir til þess að smátt og smátt hækkar frostmarkshæðin, en varmauppstreymið frá því má sín lítils samanborðið við útahafið allt í kring en þar nýtist geislun sólar nær alfarið í mjög hæga upphitun yfirborðslaga sjávar. Hiti loftsins í lægstu lögum tekur því litlum breytingum og kuldinn í háloftunum getur því haldist lengi verði ekki blöndun við hlýrra loft.

Kaldir kjarnar, eins og sá sem nú er við landið eru oft einangraðir og í hálfgerðir frystiskápar sem lifa eigin lífi yfir hafsvæðum. Varmi berst þá ekki að neðan í líkum mæli og gerist að sumarlagi yfir meginlöndunum, eða á haustin og veturna þegar kraftmiklar lægðir éta auðveldlega og blanda köldu kjörnunum saman við hlýrra loft úr suðri.

Vona að þetta svari spurningu Guðmundar Sævins !

ESv

[Guðmundur Sævin Bjarnason (IP-tala skráð) 8.6.2011 kl. 07:52]

Þakka fyrir.