Snarpar hviður undir Hafnarfjalli síðar í dag

Í júlí er tíðni hvassviðri og storma einna lægst yfir árið. Þarf ekki að koma á óvart því um mitt sumar láta lægðir sem orð er á gerandi sjaldnast á sér kræla.  Það á þó ekki við núna því allmyndarleg lægð er nú á sunnanverðu Grænlandshafi.  Með henni skil og úrkoma norðaustur yfir landið í kvöld og nótt.

Þessi skilum fylgir líka nokkuð ákveðin SA-átt sem nær hámarki að öllum líkindum í kvöld. Margir liggja í tjöldum eða eru á ferðinni með vagna sína.  Við þessar aðstæður þarf að sína aðgát og mín reynsla er sú að allur vindur yfir 10-12 m/s er til óþæginda fyrir viðlegubúnað.

Þá má gera ráð fyrir vindhviðum undir Hafnarfjalli síðar dag. Hviður allt að 25-30 m/s um miðjan daginn, en 30-35 m/s síðdegis og í kvöld. Sama á við um utanvert Kjalarnesið, eins Fróðárheiði og veginn fyrir Snæfellsnes utan við Ólafsvík, eins og ég orðaði það í tilkynningu til Vegagerðarinnar kl. 09.

Reiknað er með að vindur gangi mikið niður nálægt miðnætti um suðvestanvert landið, en strekkingur verður víða norðan- og austanlands fram undir morgunn.