Samanburður á spám

Bregðum nú á leik og berum saman vinsælar spár af netinu hvor úr sinni áttinni.  Annars vegar spá af vedur.is og hins vegar yr.no sem margir landsmenn heimsækja reglulega.  Á báðum þessum vefgáttina kemur mannshugurinn hvergi nærri við túlkun og eru spárnar alsjálfvirkar úr reiknilíkönunum.

Aðferðin er sú að á kl. 09 í morgun miðvikudag var farið inn á báða þessi vefi og skoðuð spáin kl. 12 á hádegi komandi laugardag. Því er um að ræða þriggja daga spá eða rétt rúmlega það (+76 tímar). Það kemur fram á vedur.is að spáin sé byggð á reikningum frá því kl. 00 í nótt, en engar slíkar upplýsingar er að hafa frekar en venjulega hjá yr.no.

Samanburðinn má sjá fyrir fimm staði í meðfylgjandi töflu. Tiltölulega lítill munur er á milli spánna tveggja, einkum þó sem lýtur að því  hvort það muni rigna á hádegi eða ekki.  Vissulega benda veðurspár til þess að komandi laugardagur ætli að verða fremur vætusömur um mikinn hluta landsins enda gert ráð fyrir lægðarsvæði á leið norðaustur yfir landið.

Eins og áður sagði eru þessar spár alsjálfvirkar.  Ég hefði tilhneigingu til að draga úr úrkomulíkum á Egilsstöðum og jafnvel Akureyri einnig við þessar aðstæður.  Loft er komið af fjöllum og það er vel þekkt að hléáhrif fjallana eru almennt séð heldur vanmetin í tölvulíkönunum sem liggja til grundvallar þessum spám þegar úrkoma er annars vegar.  Ekki síst á sumrin. Á hitt ber þó að líta að skil verða líkast til á leið yfir landið um þetta leyti og vafalaust rignir lítilsháttar með þeim um skamma stund um leið og þau fara hjá.  Þess vegna gætu þau verið að verki alveg um hádegisbil og þess vegna spáð úrkomu kl. 12.  En íbúar á Héraði þekkja best sjálfir að sjaldnast fer saman rigning með hægum SV vindi og 16 stiga hita !  

 

Samanburður á veðurspám fyrir laugardaginn 30. júlí.
	Hiti	Vindur	Veður
vedur.is
Reykjavík	12°C	SV 3 m/s	Lítil rigning
Bolungarvík	11°C	SV 2 m/s	Skýjað með köflum
Akureyri	14°C	SV 2 m/s	Rigning
Egilsstaðir	16°C	S 3 m/s	Rigning
Kirkjubkl.	11°C	S 1 m/s	Lítil rigning
yr.no
Reykjavík	11°C	V 4 m/s	Skýjað með köflum
Bolungarvík	10°C	NV 4 m/s	Skýjað með köflum
Akureyri	15°C	S 1 m/s	Lítil rigning
Egilsstaðir	15°C	SV 1 m/s	Rigning
Kirkjubkl.	11°C	SA 2 m/s	Rigning

 

Athugasemdir

[Árni, 27.7.2011 kl. 11:57]

Áhugaverðar pælingar sem þú mættir gjarnan taka aðeins lengra því yr.no er síða sem ég skoða mjög oft og hef tekið eftir því þar að langtímaspá þar er ákaflega fljót að breytast. T.d. ef maður ætlar að skoða spána fyrir laugardag á mánudegi og út vikuna þá á spáin til að rokka alveg frá slagviðri upp í glampandi sólskin eftir því sem á vikuna líður, jafnvel svo að það fari nokkra hringi. Er yr.no áreiðanleg síða til að skoða veðrið hér á Íslandi ?

[Guðrún (IP-tala skráð) 27.7.2011 kl. 12:43]

Við Austfirðingar höfum einmitt aldrei skilið í því þegar verið er að hamast við að spá rigningu í s-v áttum um hásumar.. þá er einmitt bongóblíða og "Spánarveður" á Austurlandi. Það rignir EKKI í SV átt fyrir austan...

[Magnús Waage (IP-tala skráð) 27.7.2011 kl. 13:16]

Veistu til þess að gerður hafi verið samanburður á "áræðanleika" á sjálfvirkum spám hér á landi? Þær sem ég horfi mest á eru Belgingur og bæði módelin hjá Veður.is, aðallega vindur á höfuðborgarsvæðinu.

[Einar Sveinbjörnsson, 27.7.2011 kl. 20:25]

Rétt er að spárnar breytast ótt og títt inn á þeim vefsíðum sem við oftast skoðum.  Það er í eðli sínu jákvætt og gefur til kynna að reikningarnir eru stöðugt endurnýjaðir og nýjustu upplýingar því tiltækar.  Sums staðar eru spár uppfærðar á 6 klst. fresti.  Þegar breytingar verða í langtímaspá, t.d. frá morgni til kvölds er það oftast óbrigðult merki þess að óvissa er enn talsverð og í raun óásættanleg fyrir þann dag sem verið er að skoða.  Gott ráð er að treysta ekki spá fyllilega fyrr en svipuðu veðri hefur verið spáð tvo eða þrjá daga í röð.  Þarna er þá einkum verið að tala um 5 til 10 daga fram í tímann. Spárnar á yr.no eru áreiðanlegar, sérstaklega (eins og ávallt er) nálægt okkur í tíma eða 1 til 3 daga fram í tímann.  Þó hefur mér fundist spárnar í sumar hafa verið of "kaldar", þ.e. hiti of lágur og eins vantar oft nokkuð upp á styrk vindsins þegar gert er ráð fyrir hvassviðri.  Kostur spánna á yr.no (sem gerðar eru út af Norsku Veðurstofunni) er hins vegar tvímælalaust tímaupplausn þeirra og oft má fá ágæta mynd at tímasetningu veðurbreytinga.

Spárnar á yr.no hafa ekki verið áreinleikaskoðaðar hér á landi eftir því sem ég best veit.  Það er hins vegar auðvelt fyrir staði þar sem veðurathuganir eru gerðar.  Staðspár Veðurstofunar á vedur.is og víðar hafa heldur ekki verið gæðaprófaðar, en í dag var það upplýst hjá Thedóri Frey á Veðurstofunni að slíkt væri í bígerð.  Tímabært mál og verður vitanlega til þess að menn reyna að bæta sig ekki satt ?

Rignir ekki í SV-átt segir Guðrún !  Ágæt er einmitt af túlka þessar alsjálfvirku spár áfram og smámsaman lærir maður á annmarka þeirra og kerfisbundnar villur.  Skýr tilhneiging þeirra er t.a.m. sú að spá oftar rigningu en en í raun er á sumrin.  Spár eins og þessar ráða líka sjaldnast í staðbundin fyrirbæri eins og síðdegisskúri ofl. af þeim toga.

ESv

[Vigfús Eyjólfsson (IP-tala skráð) 2.8.2011 kl. 16:58]

Sæll Einar

Tímaupplausnin á landshlutaspákortum Veðurstofunnar er 1 klst http://www.vedur.is/vedur/spar/thattaspar/sudurland/.