Aftur tími næturfrostanna

Halda má með nokkrum sanni að dagana 21. júlí til 6. ágúst hafi ríkt hásumar á landinu. Þessi kafli var samfelldur án næturfrosts nokkurs staðar á landinu.  Síðan þá eða undanfarnar fjórar nætur hefur verið að mælast frost sums staðar á hálendindinu og eins á stöku stað í byggð.  Þannig mældist nær 2 stiga frost síðustu á nótt fremst í Eyjafirði í Torfum.  Eins á Möðruvöllum í Hörgárdal (ljósmyndin er þaðan) og á Haugi í Miðfirði.  Allt eru þetta þekktir staðir af næturfrostum og mikilli dægursveiflu hitans. 

Þetta sumar virðist ætla að skera sig nokkuð úr hinum síðustu, einmitt fyrir þessi endurteknu næturfrost, en framan af var kalt eins og menn muna og jafnvel í júlí eftir að hlýna tók mældist einhvers staðar mælst frost fimm morgna, seinast 21. júlí einmitt á Möðruvöllum. 

Hann lengist stöðugt tími næturinnar þar sem engrar inngeislunar nýtur og útgeislun yfirborðsins er kröftug á meðan heiðríkt er og loftið þurrt.  Næstu daga er spáð svipuðu veðri og því verða þeir fleiri staðirnir um mikinn hluta landsins þar sem hætt verður við því að hitinn fari undir frostmark.  Það er líka tekið að kólna nokkuð fyrir norðan landið, eins yfir Grænlandi og þar um slóðir.  Sú þróun mun halda áfram næstu daga.  Þetta eru vitanlega skýr haustmerki þar, en ekki er gert ráð fyrir því að þetta svala lofti nái til okkar svona fyrsta kastið a.m.k. 

En þrátt fyrir þessa blíðudag, með sólskini og stilltu veðri er sumri engu að síður tekið að halla. Um að gera samt að njóta þessara góðu ágústdaga og þeirrar undurfallegu birtu sem er um þessar mundir.

 

Athugasemdir

[Anna Sigríður Guðmundsdóttir, 10.8.2011 kl. 19:55]

það haustar snemma. Ég var að vona að berin fengju tvær vikur til viðbótar, en það er ekki víst að svo verði.

 M.b.kv.

[Theódór Norðkvist, 11.8.2011 kl. 14:16]

Hvar er hægt að nálgast tölfræði um næturfrost á hinum ýmsu veðurstöðvum? Ég var að reyna að finna hana á vedur.is, en það lá allavega ekki í augum uppi hvar eða hvort slíkt efni væri á síðunni.

Til einföldunar myndi ég fyrst og fremst vilja upplýsingar um næturfrost á veðurathugunarstöðvum á Vestfjörðum, helst nokkra mánuði a.m.k. aftur í tímann.

[Einar Sveinbjörnsson, 11.8.2011 kl. 15:09]

Þú skalt hafa samband við Veðurstofunna Theódór upp á tíðni næturfrosta.

Heppilegast að óska eftir skrám yfir lágmarkshita dagsins og vinna síðan sjálfur úr þeim gögnum.

ESv

[Þór Sigurðsson (IP-tala skráð) 11.8.2011 kl. 15:16]

Hvað með að nota http://portal.belgingur.is ?

Þar ættirðu að geta nálgast þetta allt saman eftir þínum eigin skilyrðum.

Bk,
   Þór

[Theódór Norðkvist, 11.8.2011 kl. 15:55]

Takk fyrir svörin, Einar og Þór, athuga þetta.

[Sigurður Þór Guðjónsson, 11.8.2011 kl. 16:32]

Ekki hef ég hundvit á tölvuhugbúnaðargerð. En eins gagnlegt og Veðurtorgið er mætti einmitt koma þar fyrir einhvers konar búnaði sem gerði kleift að reikna meðaltöl. Það er hægt að skoða t.d. allar hitatölur í einum mánuði en ekki hægt að ýtaá takka til að fá hitameðaltal mánaðarins, og svo framvegis.