Tilraun með 6-11 daga spár

Hef um nokkurn tíma verið að velta því fyrir mér að birta veðurspár hér á þessum vettvangi sem ná heldur lengra en hinar hefðbundnu sem oftast eru til 6 eða 7 daga.  Freistandi er að stíga einu skrefi lengra og notast við svokallaðar klasaspár reiknimiðstöðvanna til að draga upp líklega mynd af veðri næstu 5-6 daga þar á eftir.

Ég mun næstu vikur setja slíkar spár inn hvern fimmtudag sem ná frá miðvikudegi í komandi viku til mánudags.  

Ætlunin er síðan að meta eftir á hvernig til tókst.  Ég geri mér grein fyrir því að stundum verður maður alveg "úti að aka", en vonandi ívið oftar með nokkuð rétta línu. Fjalla síðar um aðferðina, aðgengi að upplýsingum og hvernig þær eru túlkaðar, en læt hér fyrstu spánna gossa.  Veðurspá næstu daga og fram á miðvikudag má sjá hjá Veðurstofunni hér.

Miðvikudagur 31. ágúst:

Grunn lægða eða lægðardrag á Grænlandshafi.  SV-læg vindátt. Þungbúið og úrkoma vestan- og suðvestantil, en þurrt og jafnvel bjart norðan- og austanlands.  Þokkalega hlýtt á landinu.

Fimmtudagur 1. september:

Svipað veður og ekki markverðar breytingar.

Föstudagur 2. september:

Lægðagangur úr suðvestri með S-átt og röku og mildu lofti.  Rigning sunnan- og einkum þó vestanlands. Fremur vindasamt.

Laugardagur 3. september:

Svipað veður og sennilega vindasamt. Þessa dagana verður háþrýstisvæði heldur að styrkja sig í sessi við Bretlandseyjar og eykur þannig á líkurnar á suðlægu og mildu lofti komandi daga.   

Sunnudagur 4. september og mánudagur 5. september:

Fremur hlýtt með S -g SA-átt.  Einkum milt í veðri norðan- og norðaustanlands.  Lægð af einhverju tagi við landið sunnan eða vestanvert á sunnudag/mánudagog rigning frá skilum hennar.

 

Mat á óvissu.

Hún er einkum tengd staðstetningu og styrk hæðarinnar sem nú er spáð að muni byggjast upp yfir Bretlandseyjum eða N-Evrópu.  Staðsetningin og styrkur ræður talsverðu um lægðabrautina hér við land.  Hvort hún verði við landið eða um Grænlandssund fyrir vestan okkur. Illa fyrirséðar fellibyljaleifar s.s. IRENE geta sett strik í reikninginn, berist þær norður undir Nýfundnaland eða Labrador sem mögulega gæti orðið raunin snemma í næstu viku. 

Athugasemdir

[Haraldur Haraldsson, 26.8.2011 kl. 00:10]

Eg er mikil veðurmaður og bíð spentur,það er erfitt en gaman að spá svona/Kveðja og þakklæti

[Áskell Örn Kárason (IP-tala skráð) 26.8.2011 kl. 13:56]

Bíð líka spenntur. Fyrir okkur sem e.t.v. pælum aðeins meira en meðalglópurinn er gaman að fá þessar útlistanir á líkum og lauslega á því hverju spáin byggir á. Maður vill gjarna hafa hugmynd um það hversu líklegt það er að einhver tiltekin þróun eigi sér stað og hvað það er sem gæti breytt útlitinu.

[Magnús Óskar Ingvarsson, 27.8.2011 kl. 14:32]

Sæll Einar! Mikið ertu áræðinn að þora að spá svona. En það er gaman að því að einhver sem virkilega hefur vit á fáist til þess að prófa. Það verður líka mjög gaman að sjá matið eftirá. Hitt er svo verra að spáin hljóðar upp á rok og rigningu suðvestanlands, sem er ekki alveg nógu gott fyrir Ljósanóttina hér í Reykjanesbæ. Þess vegna skulum við ekkert hafa hátt um þessa spá, það fælir fólk frá að koma!