Greinileg umskipti í veðrinu

Í nokkrar vikur hefur verið ríkjandi NA-lægur vindur á landinu eða vindáttir þar í kring. Loft af suðlægum og suðvestlægum uppruna hefur vart borist frá því því um verslunarmannahelgina.  Segja má að þetta veðurlag hafi verið viðvarandi frá 1. eða 2. ágúst.  Hiti er líka nokkuð undir meðaltalinu 1961-1990 á Akureyri.  Hins vegar hefur verið hlýrra sunnan- og vestanlands.  Í Reykjavík er þannig heldur yfir meðaltali þessa sama árstíma, en fremur þurrt hefur verið þessar vikur, aðeins mælst 14,5 mm í Reykjavík svo dæmi sé tekið.  Það í ágætu samræmi við ríkjandi vindátt, þó vissulega hafi líka stundum blásið að austri.

Í dag, 28. ágúst er orðin breyting, komin SV-átt og dregið fyrir sólu um landið vestanvert og um leið rofar til eystra og hlýnar.  Það sem meira er að spáð er læðgum úr suðvestir í grennd við landið næstu daga með vindátt á milli SA og SV.   Umskiptin eru klippt og skorin og falla ágætlega að almanakinu, þ.e. höfuðdegi sem er á morgun.

Stóra myndin er sú að viðvarandi fyrirstöðuhæð eða hæðarhryggur yfir N-Skandinavíu, Finnlandi og þar um slóðir er að gefa sig. Við Skotland og Írland fyllist líkaháloftadrag sem þar hefur haldið sig og tengist reyndar rofi háþrýstingsins norðaustri.  Kaldara loft breiðir nú úr sér til suðurs fyrir vestan Grænland og veldur háloftadragi á Grænlandshafi og við S-Grænland.  Það nærir aftur lægðir sem berast hingað til lands.  Sem bein afleiðing þessa, styttist óðfluga og óhjákmæmilega í fyrstu haustlægðina á okkar slóðum.

Athugasemdir

[Ásthildur Cesil Þórðardóttir, 28.8.2011 kl. 11:15]

Og ég sem var að vonast eftir hlýjum september og jafnvel október, við eigum það inni eftir svona leiðinlegan ágúst.

[Þorkell Guðbrands (IP-tala skráð) 28.8.2011 kl. 17:04]

Nú, nú, svo segja tölvuspár að áhrifa fellibylsins Irene, sem er að berja á austurströnd USA þessa stundina, fari að gæta hér á fimmtudaginn. Irene verður reyndar orðin að frekar djúpri lægð um það leyti. Svo telja tölvurnar að þessi sama lægð éti nálæg lágþrýstisvæði og setjist nánast að hér yfir landinu með lækkandi hitastigi, aukinni úrkomu og vaxandi vindi. Gaman, gaman.

[Ásthildur Cesil Þórðardóttir, 28.8.2011 kl. 17:37]

Úff!!!

[Bjarni Guðmundsson (IP-tala skráð) 28.8.2011 kl. 20:36]

Bregst ekki Höfuðdagurinn! Hve oft hefur það annars gerst? Furðu mörg óþurrkasumurin gáfu sig þá Hann gekk til heiðríkju og stilltra frostnátta en bjarglegs heyþurrks þegar "tekið hafði af" ....

[Þorkell Guðbrandsson (IP-tala skráð) 29.8.2011 kl. 10:17]

Mæli með að fólk lesi líka blogg Trausta Jónssonar, veðurfræðings  http://trj.blog.is/blog/trj/   til að fá vísindalega skýringu á þessu.