Eyðimerkurloftslagið á Þingvöllum

Tók eftir því með veðurfregnir útvarps í bakgrunni í morgun þegar Friðjón Magnússon á Veðurstofunni sagði  að mest frost á landinu hefði verið 7,8 stig á Þingvöllum. Kannaði málið og rétt er að frostið fór í þetta á Leirunum við Þjónustumiðstöðina þar sem mælingarnar eru gerðar í dag. 

Lætur nærri að þetta sé með mesta frost sem mælst hefur á Þingvöllum í september. Þó ekki alveg því 16. árið 1998 mældist á sama stað -8,2°C  og þegar mælt var við Þingvallabæinn fór frostið í 8,6 stig undir lok mánaðarins 1971 eða nánar tiltekið þann 29. 

Það er hins vegar engan veginn hægt að segja að kalt loft sé yfir landinu.  Hitavísitölur loftmassans eru ekki fjarri meðallagi árstímans. 

Yfirskriftin er eyðimerkurloftslag á Þingvöllum.  Hvað hefur það að gera með kuldann ?  Jú einmitt þannig að líkt og í eyðimerkum er dægursveifla hitans mjög mikil þessa heiðu daga og sérstaklega á Þingvöllum.  Þannig var hitinn um og 13°C í gær um og eftir miðjan daginn þegar sólin var í hádegisstað. Um leið og hún settist um kl. 19 féll hitinn skart og var komið frost um kl. 21. Náði það hámarki snemma í morgun við sólarupprás og eftir það reis hitinn jafnskjótt og hann féll. 

Jarðvegur er þurr um þessar mundir líkt og í eyðimörkum.  Rekja temprar hins vegar dægursveiflu hitans.  Loftið er líka þurrt (á mælikvarða rakastigs) líkt og í eyðimörkum.  Við það dregur staðbundið úr gróðurhúsaáhrifum vatnsgufunnar og hitafallið í útgeislun næturinnar verður enn meira fyrir vikið. 

Lengra nær samlíkingin ekki, en ef ekki fer að rigna fer fyrir gróðri á Þingvöllum líkt og í eyðimörkum, hann skrælnar.    Ekki þarf þó að örvænta strax alla veganna, því útlit er fyrir vænar haustrigningar allra næstu daga.

Ljósmyndin er ein fallegra úr myndasafni Gúnnu og frá því í fyrrahaust.