SA-hvassvirði í dag, hviður undir Hafnarfjalli og víðar.

Nokkuð djúp lægð er nú á  sunnanverðu Grænlandshafi og skil hennar verða á ferðinni norðaustur yfir landið í dag.  Lægðin þessi er farin að hægja ferðina og sama má segja um skilin.  Þess vegna kemur til með að blása og rigna meira og minna í allan dag um landið vestanvert.

Gera má ráð fyrir vindhviðum undir Hafnarfjalli við þessar aðstæður, sem eru alveg dæmigerðar fyrir þann staða þegar SA-átt er í lofti.  Allt að 35-40 m/s og alveg til kvölds eða til kl. 22 til 23 þegar loks tekur að lægja í kjölfar skilanna. Á utanverðu Kjalarnesi er einnig þekkt svæði í hvassri SA-áttinni.  Með utanverður Kjalarnesi er átt við veginn fyrir utan Esjumela og einna verstur er kaflinn þar sem vigtin er skömmu áður en vegurinn fer að halla niður í göngin (sé verið á vesturleið). Mælir Vegagerðarinar er innar eða við mynni Kollafjarðar. Þar er varhugavert í N-átt en mun sjaldnar í SA-átt.   

Fróðaárheiðin er líka leiðinleg, en þar verðu almennt bálhvasst, en ekki endilega svo byljótt.  Hjálpar þó til að þar blæs vindur að mestu allt að því samsíða akstursstefnu en síður á hlið. Slæmt verður á norðanverðu Snæfellsnesi í hvassri S-átt.  Nú er hins vegar SA-átt, hviðukaflarnir þar eru því færri og byljirnir ekki eins harðir.  Engu að síður verður sviptivindasamt á stöku stað.

En aftur að þessari lægð. Hún er nú (kl.06) greind um 977 hPa og aðeins farin að grynnast.  En henni berst viðbótarorka úr suðri, nýr skammtur af hlýju lofti og dýpkar húnþví heldur á nýjan leik í dag um leið og miðjan nálgast heldur. Leifar af hitabeltisstorminum MARIA eiga einhvern hlut að máli, þó heldur lítinn sýnist mér, því hún náði ekki almennilega að samlagast þessari haustlægð. Hið raka og hitabeltislega loft hitabeltislægðarinnar barst áfram til austurs fyrir sunnan lægðina.  Vera má þó að þetta seinna dýpkunaferli lægðarinnar sé tilkomið vegna þess lofts sem MARIA bar með sér norður á Atlanshafið.

Veðurkortið er spákort HIRLAM af Brunni VÍ og gildir kl. 18 í dag. Lægðamiðjan dregur dökkgræna úrkomusvæðið undan suðvestanverðu landinu til sín og frá því rignir kröftuglega ef af líkum lætur suðvestan og vestanlands. 

 

 

Athugasemdir

[Þorkell Guðbrandsson (IP-tala skráð) 18.9.2011 kl. 15:54]

Ef ég man rétt, þá er þessi rokstaður sem þú nefnir á Kjalarnesinu um það bil þar sem vindur stendur ofan af Blikdal nærri Blikdalsánni, en vogin sem þú nefnir er litlu sunnar. Þegar maður þurfti að aka fyrir Hvalfjörðinn, var einhver versti rokstaðurinn aftur norðan við Tíðaskarðið. Ég er búinn að aka fleiri ferðir utan af landi til Reykjavíkur en ég kæri mig um að muna (þær eru líka orðnar svo margar að heilabúið í mér hefur ekki kapasitet fyrir það!), en að frátöldum Kolgrafafirðinum held ég að spottinn frá Tíðaskarði upp að afleggjaranum heim að Kiðafelli sé einhver versti vegarkafli sem ég hef komist í kast við hvað hvassviðri snertir. En víðast hvar tengjast hvassviðris og hviðustaðir einhverjum staðháttum, fjallaskörðum, daladrögum og þess háttar, sem virðast geta magnað upp storm og hviður með undraverðum fítonskrafti, að því gefnu að vindátt sé "heppileg" til þess arna. Væri gaman að eiga orðastað við þig um þetta málefni á öðrum vettvangi, því þetta er fróðleikur, sem æskilegt væri að vel menntað og fært fólk eins og þú safni saman og dragi af honum ályktanir.