Ekki hærri sumarhiti fyrr sums staðar á Grænlandi

Veðufræðingar á Dönsku Veðurstofunni DMI í Kaupmannahöfn haf tekið saman yfirlit yfir sumarveðráttuna á Grænlandi nýliðið sumar.  Fyrir áhugasama er hún í heldi sinni hér (á dönsku).

Það sem stendur upp úr er að norðvestantil á Grænlandi hefur ekki fyrr mælst hærri hiti að sumarlagi en nú.  Á flugvellinum í Thule og bænum Qaanaaq ekki langt þar frá var sumarhitinn á milli 6 og 7°C eða um 3 stigum hærra en meðaltalið segir til um. Sunnar með vesturströndinni mældist hiti víðast allt að því jafnhár og síðasta sumar, sem var mikið hitametasumar á þeim slóðum.

Þetta sumarið var áberandi hvað hlýtt var í júni og júlí á Grænlandi í heild sinni á meðan ágúst var nær meðallagi og undir lokin haustaði nokkuð ákveðið. 

Ekki er ofsögum sagt að hlýnandi veðrátta á jörðinni nái með áþreifanlegum hætti til Grænlands þessi árin.  Fyrir utan syðsta hlutann hefur heita frávikið í sjávarhitanum síðustu árin óveruleg áhrif fyrir hitafar Grænlands ólíkt því sem er hérlendis, þar sem sjávarhitinn er ráðandi fyrir hitafarið.  Á Vestur-Grænlandi hefur þannig verið óvenjulega hlýtt síðustu árin.

Uppi á miðjum jöklinum, Summit í 3.200 metra hæð hefur hiti verið mældur samfellt frá 1991. Í júli sl. sumar var meðalhitinn þar -9,9 °C sem er næst hæsti hiti þar á miðju sumri. Hlýrra var 2005.  Hiti nærri sjávarmáli tekur mið af lofthitanum hærra uppi en fleira kemur til.  Uppi á jöklinum skiptir loftblöndun miklu og það að blanda upp öllum hitahvörfum sem myndast á öllum árstímum næst ísnum. 

Myndin er frá Qaanaaq tekin í október 2009.  Ljósm. óþekktur.

Kortið er af dmi.dk

 

 

 

Athugasemdir

[Gunnar Th. Gunnarsson, 21.9.2011 kl. 16:33]

Ég var í Hollandi í allt sumar og heimamenn sögðu mér að sumarið hefði verið það kaldasta í manna minnum. Hvað segir það okkur?

[Hörður Þórðarson, 21.9.2011 kl. 19:16]

Það segir okkur að minnið er frekar lélegt...

[Sigurður Þór Guðjónsson, 21.9.2011 kl. 19:26]

Frábær athugasemd frá Herði!

[G (IP-tala skráð) 21.9.2011 kl. 22:01]

Tengist svarið nokkuð Hans Egede?

[Ómar Ragnarsson, 21.9.2011 kl. 23:22]

Áberandi var í fyrra að svo vikum skipti fóru lægðir með hlýjan loftmassa norður með austurströnd Ameríku og báru hlýindin norður með vesturströnd Grænlands.

Það sýnir skammtímaminni okkar að hvað eftir annað hefur á þessu ári verið kvartað yfir kuldum hér á landi, til dæmis í vor, en samt sýna meðaltölin ótvírætt að ef svo heldur fram sem horfir verði þetta ár með þeim hlýjustu í sögunni.

[Gunnar Th. Gunnarsson, 22.9.2011 kl. 07:53]

Sýna mælingar í Hollandi að hiti hafi verið yfir meðallagi?

[Höskuldur Búi Jónsson, 22.9.2011 kl. 09:29]

Þetta eru ekki góðar fréttir hvað varðar bráðnun Grænlandsjökuls - hraðari bráðnun heldur áfram. 

Ég gúgglaði Holland og fann eina frétt um veðrið þar í sumar. Virðist hafa verið öfgafyllra veður en venjulega (meiri úrkoma) en annars hafi sumarið verið í meðallagi hvað hita varðar: http://www.rnw.nl/english/bulletin/summer-2011-one-wettest-dutch-recorded-history   

[Sigurður Þór Guðjónsson, 22.9.2011 kl. 12:09]

Hvað eru góðar og hvað eru vondar fréttir af veðri? Hefðu það verið vondar fréttir ef sumarið hefði verið það kaldasta sem mælst hefði á Grænlandi?

[Gunnar Th. Gunnarsson, 22.9.2011 kl. 12:35]

Veðrið í Hollandi sumarið 2011 var kaldara en í meðalári.  

"There weren’t many warm days either: just seven summer days (with an average temperature of more than 25 degrees Celsius) and two tropical ones (warmer than 30 degrees Celsius) compared to 21 summer days and 3.8 tropical ones in a ‘normal’ summer.

The only thing that was normal about this summer was the average temperature of 16.5 degrees Celsius compared to 17 degrees in a normal summer. June was half a degree warmer than average, July two degrees colder, August has – again – been fairly normal: 17.5 degrees on average"

(http://www.rnw.nl/english/bulletin/summer-2011-one-wettest-dutch-recorded-history)

[Sigurður Þór Guðjónsson, 22.9.2011 kl. 12:48]

Ekki er sama að sumar sé eitt það votasta í manna minnum og eitt það kaldasta. En menn rugla þessu æði oft saman, finnst rigning sama og kuldi og hér á Íslandi finnst mörgum sól vera sama og hiti.

[Sigrún Björgvins (IP-tala skráð) 22.9.2011 kl. 13:09]

Það er auðvitað satt að skamtímaminni margra er lítið. En flest munum við best hitann að vori og sumri. Kuldinn í maí og júní sl er ekkert misminni. Samt gæti auðvitað meðalárshitinn verið í góðu lagi ef veturinn er yfir meðaltali. Getur ekki einhver góður maður frætt mig um hitafarið á Austurlandi sl vetur  annarsvegar og svo hitann sumarmánuðina og þá einkum maí til og með júlí hinsvegar. Þetta eru annars skemmtilegar vangaveltur hjá ykkur, þið vísu menn.

[Höskuldur Búi Jónsson, 22.9.2011 kl. 13:17]

Sigurður (8): Ég sagði orðrétt: "Þetta eru ekki góðar fréttir hvað varðar bráðnun Grænlandsjökuls", þannig að spurningu þinni hlýtur að vera svarað.

Gunnar (9):  "...The only thing that was normal about this summer was the average temperature of 16.5 degrees Celsius compared to 17 degrees in a normal summer. June was half a degree warmer than average, July two degrees colder, August has – again – been fairly normal: 17.5 degrees on average"

[Gunnar Th. Gunnarsson, 22.9.2011 kl. 13:33]

Höski, 0,5 gráður undir meðallagi er s.s. lítið, (2,0 gráður undir meðallagi í júlí) en ef hitinn er 0,5 yfir meðallagi, þá eru það skelfilegar fréttir?

[Höskuldur Búi Jónsson, 22.9.2011 kl. 13:56]

Gunnar, skoðaðu þetta aðeins betur: Yfir þessa þrjá mánuði, þá var hitinn 0,5 undir meðallagi í Hollandi - einn mánuður (júlí) var kaldari (um 2° undir meðallagi þess mánaðar) sem þýðir þá að hinir tveir mánuðirnir hafa verið yfir meðallagi. Að segja að sumarið hafi verið kaldasta í manna minnum segir í raun bara það sem Hörður segir - minni manna er gloppótt. 

-------------- 

En já, 0,5°C munur á hitastigi "hnattrænt" á milli einhverja áratuga - er mikið, því hitinn er ekki jafndreifður um allan hnött á hverjum tímapunkti.  

0,5°C meira eða minna hitastig í einu landi yfir þrjá mánuði er ekki mikið í landi eins og Hollandi, þar sem meðalhitinn er ekki hár né lágur almennt séð.

3°C hærri hiti á Grænlandi hefur síðan frekar mikil áhrif, í átt til meiri bráðnunar jökla og hækkandi sjávarstöðu.

[Ágúst H Bjarnason, 22.9.2011 kl. 16:35]

Sumarið mitt var aðallega í uppsveitum Árnessýslu, skammt fyrir sunnan hálendið.

Sumarið fannst mér frekar óvenjulegt, en gott samt.

Í byrjun sumars var það kalt að skemmdir mátti sjá á laufum trjáa.  Ungar plöntur drápust jafnvel.

Norðlægar áttir algengar. Líklega frekar sólríkt sumar.

Óvenju lítið um flugur og önnur skordýr. Geitungar og býflugur sáust varla og lítið um mývarginn. Fiðrildalirfur sem leggjast á trjágróður  voru frekar sjaldséðar miðað við undanfarin ár.

Fuglalíf með allra minnsta móti af einhverjum ástæðum.

Þannig kom sumarið mér fyrir sjónir. Hef ekki hugmynd um meðalhita, en ég man ekki eftir verulega heitum dögum eins og komið hafa undanfarin ár. Man reyndar mest eftir sólskínsdögum. Reyndar þóttist ég taka eftir því að hafgolan virtist vera sjaldgæfari en ég er vanur, kannski var norðanáttin henni yfirsterkari.

Ég vil kenna köldu vori um skemmdir á gróðri og hve lítið var um flugur og fugla.

Sem sagt, þetta er mín upplifun af sumrinu.