Öskugrár Skógafoss

Ég ók framhjá Skógafossi í tvígang um helgina.  Í fyrra skiptið á föstudag, fljótlega eftir að tók að rigna.  Þá var fossinn eins og maður sér hann venjulega, hvítfyssandi og tignarlegur.  Í seinna sinnið um miðjan dag í gær sunnudag í dumbungi og þéttum úða var allt annað svipmót á Skógafossi.  Vatnið var mjög skolað og fossinn var öskugrár í orðsins fyllstu merkingu.  Mér láðist að taka mynd, reyndar efast ég um að hún hefði orðið augnayndi í þokusuddanum.

Skógáin á upptök sín uppi á Skógaheiði og ferðalangar norður yfir Fimmvörðuháls ganga drjúgan spotta upp með henni.  Ekkert jökulvatn er hins vegar í Skógá, en vissulega getur hún orðið skoluð í leysingum og stórrigningum rétt eins og í öðrum dragám. 

Um helgina rigndi talsvert á þessum slóðum.  Úrkoma sennilega í nokkrum tugum millimetra frá því um miðjan dag á föstudag og fram á sunnudag.  Út frá mælingum í byggð kannski einhvers  staðar nærri 30 eða 40 mm þarna uppi.  Næg til þess að bera með sér gjósku af yfirborðinu og skola henni með lækjum og smáám út í Skógánna og áfram til sjávar.

Svipað gerðist snemma í vor og myndin hér er frá 15. apríl og birtist með frétt á ruv.is

Þó alls ekki hafi verið stórrigning nú um helgina var úrkoman mjög kærkomin, því hún skolar yfirborðið og sú aska og gjóska sem rennur til sjávar mun því ekki fjúka næst þegar þornar.  Svo mikið er víst.