Fárviðri spáð í Færeyjum

Danska Veðurstofan spáir í kvöld og framan af nóttu "orkan" í Færeyjum.  Fárviðri er það upp á Íslensku. 

Veðurstofa Íslands varar stundum við stormi (veðurhæð ~21 m/s), einstaka sinnum ofsaveðri (~28 m/s) en sárasjaldan og nærri því aldrei fárviðri sem jafngildir 32-33 m/s.

Lægðin sem um ræðir er bæði kröpp og henni er spáð því að verða 945 hPa í miðju um það bil sem hún rennir sér hjá skammt vestan Færeyja. Það má segja að eiginlega allt virðist ætla að leggjast á versta veg að þessu sinni. Það hversu kröpp lægðin er gerir það að verkum að óveðrið nær vart til Íslands, rétt strýkur austasta hluta landsins í skamma stund. En litlu má þó muna að veðrið nái frekar inn á land.

Ég sýni hér vindaspá sem gildir á miðnætti (25. nóv kl. 00).  Hún er fengin frá Reiknistofu í veðurfræði af belgingur.is.  Þar er hægt að velja spásvæðið Færeyjar og fylgjast með þróuninni með aðstoð fínkvarða reiknilíkans. 

10 mínútna meðalvindinum er spáð yfir 25 m/s  í nánast öllum rammanum og yfir eyjunum glittir í svæði  32,5 m/s. Hvernig má líka annað vera þegar gert er ráð fyrir SV 40-45 m/s í lofti, þ.e. um 1.000 metra hæð.