6 - 11 daga spá, 7. til 12. desember

Óhætt er að segja að kuldatíðin ætla að verða viðvarandi hér komandi daga.  Litlar líkur eru á þíðviðri og frostið nokkuð varanlegt að sjá.  Í fyrst lagi gæti hlánað 9 eða 10. desember.  Gæti hlánað segi ég því alls ekki er víst að það náist áður kólnar á ný um þar næstu helgi eins reiknaðar spár bera með sér.              

Veðurspá fram á komandi miðvikudag má sjá hér á vef VÍ

Miðvikudagur 7. desember:

N-lægur eða breytilegur.  Rólegheitaveður og frekar kalt á landinu. Kuldhæð yfir miðju landinu og sennilega éljabakkar snuddandi sums staðar við ströndina. 

Fimmtudagur 8. desember: 

Áfram N-átt í grunninn og herðir á frostinu ef eitthvað er.  Kuldakastið eftir helgi nær líkast til hámarki þarn um og eftir miðja viku.  Él verða með norður- og austurströndinni.

Föstudagur 9. desember: 

Enn hægur vindur.  Hæðarhryggur við landið úr suðvestri og vindur því suðvestlægur í stað N-áttar. Minnkandi frost sunnan- og vestanlands og eitthvað um él vestan- og suðvestantil.  Tunga af mildu lofti með leysingu í skamman tíma fer hratt austur yfir landið seint á föstudag eða snemma á laugardag.

Laugardagur 10. desember:

Ákveðin útsynningur.  Lægð á Grænlandshafi eða Grænlandssundi.  Éljagangur vestantil og hiti um eða rétt undir frostmarki. 

Sunnudagur 11. desember:

Áframhaldandi útsynningur fram á sunnudag og éljagangur vestan- og suðvestanlands. Heldur kólnandi.

Mánudagur 12. desember:

Heldur lítið um að vera hér við landinu, nema það að köldu lofti í vestri og norðri vex ásmeginn.  SV- eða V-átt í grunninn og enn él vestantil á landinu.

Mat á óvissu:

Flest bendir til þess að staða veðurkerfanna verði með þeim hætti langt fram eftir næstu viku að Ísland og nánasta umhverfi verði á áhrifasvæði lægðardrags í háloftunum sem aftur tengist megin kuldahvirfli norðurhvelsins sem spáð er um þessar mundir yfir Grænlandi og hafsvæðunum hér norðurundan. Hefur í för með sér vetrarkulda hér á landi.  Undir helgina er spáð suðlægri bylgju og hæðarhrygg í háloftunum (í stað háloftadrags).  Við það gæti blotað um stund og reyndar er það óvíst.  Helsta óvissan tengist einmitt þessari bylgju sem bægir frá háloftakuldanum um skamma stund. Í kjölfarið  er sennilegast að kuldinn nái aftur yfirhöndinni og þá frekar úr vestri heldur en norðri.  Hér við land því útlit fyrir útsyningsveðráttu um þar næstu helgi.

Kortið sem hér fylgir er frá ECMWF.  Sýnir spá um stöðu 500 hPa flatarins laugardaginn 10 desember. Staðan er nokkuð dæmigerð fyrir útsynningsveðráttu.  Skyggðu svæðin eru staðalfrávik í hæð flatarins í 50 öðrum hliðarkeyrslum dagsins fyrir sama tíma.  Há staðalfrávik þá hér við land þurfa ekki endilega að tákna meiri óvissu, heldur geta þau líka komið fram þegar stigull (gradient) er mikill við landið.  Með örðum orðum þegar mikið er að gerast og skarpir drættir í veðrinu eins og svo gjarnan er við N-Atlantshafið að vetrinum.  

Athugasemdir

[Daníel P. (fyrrum nemandi þinn í loftslagsfræði) (IP-tala skráð) 2.12.2011 kl. 14:56]

Þetta er ansi magnaður kuldakafli. Er ekki hætt við að metið á lægsta meðalhita í desember falli víðsvegar á landinu ef þetta heldur svona áfram? Meðalhiti í Reykjavík í desember er jú yfirleitt við frostmark og það virðist stefna í meðalhita, allavega þar til um miðjan mánuðinn, talsvert undir frostmarki.

Samkvæmt þessari töflu (http://www.vedur.is/Medaltalstoflur-txt/Stod_001_Reykjavik.ManMedal.txt - frá 1949 til 2011) hefur lægsti meðalhiti í Reykjavík verið -3,6° í desember árið 1973 og -2,3 árið 1974. Þessi kuldakafli + ágætlega lágur meðalhiti restina af mánuðinum gæti því valdið því að met falli.