Varhugaverð lægð yfir suðaustanvert landið í nótt.

Það er skammt stórra högga á milli í veðrinu um þessar mundir.  Nú er rétt að beina sjónum að lægð sem fer mjög hratt yfir og á sama tíma sem hún er í foráttuvexti.

Sést kannski best með því að bera saman tvö veðurkort úr spá HIRLAM af Brunni VÍ.  Það fyrra hefur gildistíma kl. 15 og hið síðara á miðnætti.  Ferðin á þessi lægð er mjög mikil og lægðarmiðjunni er spáð norðaustur yfir suðaustanvert landið.  Ekki mun hvessa að ráði á undan, þ.e. fólk um suðaustan- og austanvert landið mun ekki finn fyrir SA-átt að ráði.  Hins vegar er það V- og NV-áttin í kjölfar lægðarinnar sem rétt er að beina sjónum að.  Í tiltölulega skamma stund er því hætt við að að vindur veður bæði mjög hvass og ekki síður byljóttur þar sem hann stendur af fjöllum frá Eyjafjöllum austur um á Austfirði.

Það skiptir máli hver ferill lægðarinnar verður segja má í smáátriðum.  Nái sjálf lægðarmiðjan ekki inn á land verður mestur vindur úti á sjó (strengurinn næði þó til syðsta hluta landsins). Hins vegar er allt útlit nú fyrir það að miðjan komi inn á land við Mýrdalssand og þaðan til norðausturs.  Vindröstin í kjölfar miðjunnar nær þá betur til landsins fyrir austan.

En rétt á meðan dregur úr SV-útsynningnum vestan- og norðvestantil í stuttu stund, en síðanstrax á eftir ná élin sér aftur á strik með dimmviðri.

 

 

 

 

 

 

 

 

 

 

Athugasemdir

[Elías (IP-tala skráð) 9.1.2012 kl. 20:23]

Sæll,

vindörvarnar á þessum kortum eru væntanlega í hnútum en ekki m/s eða hvað?

[Einar Sveinbjörnsson, 10.1.2012 kl. 00:03]

Þú getur Elías lesið hvort þú vilt hnúta eða m/s.  Heilt strik jafngildir 5 m/s sem er nálægt 10 hnútum. Grunurinn er þó m/s ólíkt flugkortum þar sem vindörvar eru staðlaðar í hnútum.

ESv

[Elías (IP-tala skráð) 23.1.2012 kl. 16:16]

Þakka þér Einar, ég var að spá í hver kvörðun kortanna væri því ég er vanur að lesa flugveðurkort, einmitt með hnútum.