47 sm snjódýpt

Fór í smá leiðangur hér hjá mér hér í Garðabænum í kvöld áður en tók að hreyfa vind.  Ætlunin var að mæla snjódýpt og var ég vopnaður kústskafti og tommustokki.  Tók nokkrar prufur á flatlendi þar sem snjórinn var óhreyfður með öllu. 

Fönnin er ótrúlega mikið jafnfallin þessa síðustu tvo sólarhringa. Mælingarnar voru allar á bilinu 45 til 51 sm og flestar við 47 sm.  Það er sem sagt sú snjódýpt sem ég ætla að hér hafi verið í minni götu kl. 21 þann 25. janúar.  

Á Veðurstofunni voru mældir 27 sm í morgun, en eftir það kyngdi niður snjónum um og fyrir hádegi. Síðan voru líka minni él  síðdegis.  

Athugasemdir

[Skúli Víkingsson, 25.1.2012 kl. 23:25]

Mikið er mér alltaf illa við þessa sérvizku að skrifa sentímetra með sm og engum punkti. Tákn metrakerfisins eru alþjóðleg tákn en ekki skammstöfun. Táknið fyrir sentímetra er cm og á ítölsku er kílómertri táknaður með km þótt hann heiti chilometro á því hljómfagra máli.