Gróðurkoman,- ekki eftir neinu að bíða !

Jarðvegshitamælingar eru gerðar á nokkrum stöðum á landinu.  Þær gefa um þetta leyti árs ágæta vísbendingu um það hvort frost sé í jörðu.  Í Reykjavík fór frost úr jörðu alfarið úr jörðu um og upp úr 20. mars.  Á Sámstöðum í Fljótshlíð er jörð þíð og sama er að segja um Möðruvelli í Hörgárdal.  Á Hallormsstað sýna mælingar að frostlinsa sem líklega var á 10-20 sm dýpi hafi bráðnað að mestu um síðustu helgi og þar sé jörð nú orðin þíð að mestu.  Fimmti mælistðurinn er Hvanneyri, en þar haf jarðveghitmælarnir verið óvirkir um langt skeið sem að sjálfsögðu er bagalegt. Ég held að ég geti fullyrt að frost í jörðu sé talsvert minna nú en í venjulega árferði.  Því getum við þakkað að aldrei gerði verulega frostakafla á auða jörð.  Eina frostið sem heiti gat í vetur og var snemma í desember gerði á alvhíta jörð um mikinn hluta landsins. Nýlegur og loftmikill snjórinn er þá eins og besta einangrun.

Enn eru þó næturfrost að herja á jörðina og svo verður sums staðar alveg fram á laugardagsnóttina.  Breytingar verða þá í kjölfarið þega spá er skilum með mildu lofti og rigningu austur yfir landið.  Reyndar kólnar heldur í kjölfar þeirra í skamma stund, en aftur er að sjá sem milt loft ná til landsins strax eftir helgi.

Þegar varmi sólar og í loftinu fer ekki í það að bræða klaka í jörðu hlýnar jarðvegurinn ákveðið og gróðurinn tekur á sprett, jafnt grös sem trjágróður.  Gangi veðurspárnar eftir ættum við að sjá mikla breytingu í áttina til grænkunar og blómgunar um og upp úr helginni, sérstaklega þó um sunnanvert landið, en Norðurland, norðanvert Austurland og Vestfirðir koma þó í kjölfarið að þessu leytinu eins og ævinlega.  

Myndin er af vef Veðurstofunnar og sýnir jarðvegshitann á Möðruvöllum í Hörgárdal síðustu 6 daganna.  Nemi á 5 sm dýpi gefur gögn í grænu línuna.  Neðst er sú rauða á 50 sm dýpi ofan í moldinni.

Athugasemdir

[Jón (IP-tala skráð) 26.4.2012 kl. 10:54]

Sæll Einar.

Þú segir að frost hafi farið úr jörðu 20. mars í Reykjavík.  Ég bý við Vesturberg í Breiðholti.  Var ég að vinna í mínum garði um síðustu helgi.  Ætlaði að taka illgresi og annað úr beðum, en gat ekkert gert vegna þess að moldin var öll frosin.  Efsti hluti grasflatarins í garðinum er harður vegna þess að hann er frosinn.   Eitthvað hljómar þetta öðruvísi en þið fræðingarnir segið aðstæður vera !  Vonandi verður rigningin og hlýnandi veður til þess að klakinn fer úr jörðu hjá mér. 

[Einar Sveinbjörnsson, 26.4.2012 kl. 14:31]

Sæll Jón !

Mælingar eru strjálar og inn í spilar líka hæðin yfir sjávarmáli vitanlega.  Í næturfrostunum sérstaklega um liðna helgi  fraus yfirborðið hvað eftir annað en þiðnaði jafnharðan þar sem sólin náði að skína. Aðfaranótt laugardag var frostið 3 stig í um fimm til sex klukkustundir  á Hólmsheið ofan Breiðholts.  Slíkt frost veldur klárlega freða í yfirborðini.  Líkleglega hefur síðan verið þýtt þar undir !

ESv

[Áskell Örn Kárason (IP-tala skráð) 26.4.2012 kl. 19:07]

Í mínum heimagarði á Akureyri og öðrum austur í Reykjadal var jörð þíð 20. mars og líklega mun fyrr. Einstaka næturfrost síðan hefur ekki megnað að mynda neina frostskán. Að þessu leyti er vorið því með besta móti í ár.