El Nino á leiðinni ?

Allar líkur eru á því í Kyrrahafi af ENSO sveiflan stefni óðfluga í El-Nino fasa.  Sjávarhiti í skilgreindum reit  3.4 í Kyrrahafinu hefur farið hækkandi frá áramótum og spár um yfirborðshita sjávar á þessum slóðum er í þá veru að þróunin haldi áfram eins og sjá má á meðfylgjandi spá sem birt er á síðu dönsku Veðurstofunnar.  Þetta er klasaspá 50 keyrslna og þrátt fyrir nokkra dreifingu stefnir miðgildið klárlega áfram upp á við.  Fylgst er sérstklega með hitabreytingum á þessum tiltekna svæði því það þykir sérlega næmt fyrir þróun mála næstu mánuði. 

Jólabarnið, eins og merking heitisins El-Nino er í raun, mætir því ef til vill á sínar heimaslóðir við strendur Perú í haust.  Landvindur í S-Ameríku snýst þá í hafvind við miðbaug.  Þurrkar verða að vætutíð á þessum slóðum og eins tekur fyrir uppblöndun sjávar með þeirri afleiðingu að gjöfular veiðar ansjósu hrynja í nokkurn tíma.  Allt er þetta vel þekkt, en El-Nino atbuður í sveiflunni hefur ekki orðið frá 2006. La Nina ástand hefur hins vegar verið áberandi síðustu árin meira og minna, e.t.v. afar veikur El-Nino 2010.  En frá því í nóv/des sl. hefur heimsbyggðin (lesist veðurgeirinn) staðið á öndinni yfir því hvenær yfirfall heita sjávarins við Ástralíu og Indónesíu taki að streyma austur yfir í áttina að Suður Ameríku.

Síðasti stóratburður El-Nino átti sér stað 1997.  Árið eftir, þ.e. 1998 er jafnframt álitið það heitasta á jörðinni í röð hlýrra ára. El-Nino sem hefur með beinum hætti áhrif á hita um 15% flatarmáls jarðar veldur þar af leiðindi mun meiri sveiflum í meðalhita jarðar, en t.a.m. þar sem er að gerast frá ári til árs á okkar slóðum og við norðavert Atlantshafið.  Ekki svo að skilja að okkar svæði skipti ekki máli í stóru hitamyndinni, en ég er bara að draga fram að sveiflur á víðáttumiklum hafsvæðum sinn hvoru meginn miðbaugsins (og þar sem fáir og jafnvel engir búa) telja verulega þegar meðalhiti jarðar er annars vegar.

Áhrif El-Nino utan hitabeltissvæðanna sem áður eru talin eru m.a. þau að úrkoma eykst norður með allri strönd Ameríku, allt norður í Alaska.  Eins eykst vætan í suðausturhluta Bandaríkjanna, einkum að vetralagi.  Einnig hafa menn séð allgóða fylgni við tíðni fellibylja á Atlantshafi og að þeim fækki við El-Nino. Aðrir fylgifiskar eru tilviljunarkenndir, en mér hefur þó virst að kaldi háloftakjarninn fyrir vestan Grænland verði bæði minni og fjarlægari við og í kjölfar El-Nino atburðum. 

Ítarleg umfjöllun er á Vísindavefnum um El-Nino og mæli ég með henni fyrir áhugasama.  Myndin af frávikum sjávarhita "stóra árið" 1997 er þaðan fengin.    

Athugasemdir

[Ágúst H Bjarnason, 28.4.2012 kl. 14:58]

Sæll Einar.

Til fróðleiks fyrir lesendur síðu þinnar þá er hér samansafn af beintengdum ferlum og myndum er varða ENSO (El Niño/La Niña Southern Oscillation) sveifluna:  Enso page.

Vilji maður fylgjast með breytingunum í rauntíma þá er það hægt á þessari vefsíðu. Þrna eru einnig krækjur að helstu rannsóknastofnunum er tengjast þessu fyrirbæri.

Með kveðju,

[Krímer (IP-tala skráð) 28.4.2012 kl. 18:30]

So?

[Sveinn Atli Gunnarsson, 28.4.2012 kl. 23:03]

Það verður fróðlegt að fylgjast með þróun mála á næstunni. Því þrátt fyrir að ekki hafi verið sterkir El Nino á ferðinni síðan 1997/98, þá var síðasti áratugur, hlýjasti áratugur frá því mælingar hófust. Þannig að það eru allt eins líkur á að það geti fallið hitamet á heimsvísu við næsta sterka El Nino, jafnvel þó hann yrði ekki eins sterkur og 1997/8. Síðasta ár var t.d. La Nina ár (eins og Einar kemur inná, hafa þau verið áberandi á síðustu árum) - en það var líka hlýjasta La Nina ár frá því mælingar hófust, sjá t.d. umfjöllun hér 2011 – hið heita La Nina ár og svo fróðlega greiningu hér, About the Lack of Warming…, þar sem sjá má mjög fróðlegt graf (3ja grafið) þar sem hlýnunin er borin saman eftir því hvort um er að ræða El Nino, La Nina eða "hlutlaus" ár.

PS. Reyndar myndi ég ekki segja að 1998 hafi verið heitasta ár síðan mælingar hófust, en það er þó eitt af þeim hlýjustu, ásamt m.a. árunum 2005 og 2010 (en það er erfitt að gera upp á milli þessara ára, fer eftir hvaða gagnaröð er skoðuð).