Kuldakastið fer í metabækurnar

Á fréttavef Morgublaðsins er rætt við Trausta Jónsson í dag og fann hann þar að fyrranótt hafi verið sú kaldasta í Reykjavík þetta seint, þ.e. eftir 20. maí. Frostið fór þá niður í 2,6 stig.  Það má skoða kuldan út frá mörgun hliðum.  Fram kom hjá Trausta í útvarpinu í hádeginu að oft hefur orðið kaldara en nú á Norðurlandi og einnig snjóað fram í júní eins og ég benti reyndar einnig á færslu í hér gær.  Á Hveravöllum hafði einu sinni orðið kaldara en það var í maí 1979. 

Í gær vakti það athygli hversu lágur hitinn var sunnanlands í hádeginu. Í Reykjavík var hitastigið ekki nema 1,1°C kl. 12.  Samanburður leiðir í ljós að a.m.k. frá því upp úr 1920 hefur aldrei verið þetta kalt í Reykjavík á hádegi eftir 20. maí.  Kuldavorið 1949 var mældust 1,9°C í hádeginu 27. maí og 22. maí 1979 1,5°C.  Það væri einnig áhugavert að skoða sólarhringshita á ýmsum stöðum á landinu og meiða við þessi tvö tilteknu vor.  Núna hins vegar er ástandið í umhverfinu allt annað en var bæði 1949 og sérstaklega 1979. Hafís var þá landfastur við Norðurland eins og sjá má á meðfylgjandi úrklippum úr Morgunblaðinu frá 23. maí 1979.  Við þær aðstæður kom hastarlegt kuldakastið ekki endilega eins á óvart og það gerir nú, þó það hafi líka verið umfjöllunarefni þá.

Hretið 1979 líkist nokkuð þessu sem nú gengur yfir.  Kalt var 20. og 21. maí með frosti um mest allt land að næturlagi. Ofan í kuldann kom síðan lægð úr suðri og suðaustri með úrkomusvæði inn yfir Norðurland með mikill snjókomu og slyddu líkt og nú dagana 22 til 24. maí 1979. 

Þá var kuldinn tengdur tíðinni, harðindum vetrarins og hafísnum sam var viðloðandi landið allan maímánuð.  Nú er umhverfi allt annað, ísinn langt undan, mildur vetur norður undur Svalbarða og hitamet á Íslandi fyrr í þessum mánuði.