Vaxandi veðurhæð sunnantil

Nú kl. 15 voru komnir 28 m/s á Stórhöfða og hafði þá verið að hvessa jafnt og þétt frá því fyrir hádegi.  Athyglisvert var að sjá skömmu eftir hádegi þann vindstigul sem var ofan af landi út í Vestmannaeyjar eða öllu heldur Stórhöfða. Á meðan þar voru 24 sekúndumetrar voru þeir á sama tíma ekki nema 4 í Þykkvabænum.

Veðraskil með úrkomu eru nú komin inn á landið eins og sjá má á tunglmyndinni sem er frá kl. 13:47. Reiknað er með slyddu eða rigningu á láglendi en snjókomu hærra uppi á meðan þau eru að fara rösklega norður yfir landið.  

 

Handan þeirra má sjá vel þroskaða og myndarlega éljaklakka, sem verða viðloðandi suðausturströndina á morgun.  Á Veðurstofunni var Kristín Hermannsdóttir á vakt í morgun.  Hún orðar áhrif þessara klakka snyrtilega í spá fyrir Suðausturland eða: "13-18 m/s á morgun og stormél (allt að 23 m/s).  Sem sagt það er reiknað með að verulega hvessi þá stund sem élin ganga yfir.

Spá VÍ má sjá hér.

Athugasemdir

[Þórir (IP-tala skráð) 13.3.2007 kl. 11:00]

Þú ræðir ekkert hversu arfavitlaus veðurspá Krístínar var fyrir Norðurland 9. mars (Birtist á RÚV á fimmtudagskvöld) og í morgunblaðinu á föstudag. Eins vitlaus spá og hugsast gat.