Snjókoma, éljagangur og hríðarveður

Fyrirsögn þessarar færslu gefur til kynna þá veðurrétti sem í boði verða á borðum landans í dag og á morgun.  Lægð hefur verið að myndast á Grænlandshafi og fer hún hratt skammt fyrir sunnan landið í dag og lægðardrag sem er skilgetið afkvæmi hennar dregst með henni yfir landið.  Þetta samsull hefur í för með sér að víða á landinu mun snjóa samfellt um tíma og þess á milli má gera ráð fyrir éljagangi.  Það er hins vegar ekki svo auðvelt að segja til um hvar og hvenær muni snjóa að verulegu marki við þessar kringumstæður.

 

 

• Á suðurlandsundirlendinu allt austur í Mýrdal verður þó nokkur ofankoma með slæmu skyggni á köflum fram yfir hádegi.
• Í kvöld og fram á nótt geta Austfirðingar búist við hríðarveðri og samfara nokkuð ákveðinni NA-átt. líkast til afleit akstursskilyrði um tíma.    
• Svipað verður uppi á teningnum á norðanverðum Vestfjörðum, en þar fer að hríða fyrr, eða síðdegis. Sama á við á Ströndum og annesjum norðanlands.

Um leið og sjálf lægðin dýpkar veruleg á leið sinni austur til Noregs er óhjákvæmilegt annað en hér á landi snúist vindur til N-áttar (eða NA) um land allt.  Á morgun má því gera ráð fyrir nokkrum vindi, þó ekki verulega hvössu og hríðarhragglanda víða norðan- og norðaustanlands, sums staðar él en annars staðar verður samfelld ofankoma. 

Þessi umtalaða lægð mun hafa víðtækari áhrif en hér á landi.  Hún mun valda verulegum umskiptum á veðri á meginlandi Evrópu.  Meira um það á morgun.

Um veðurkortið:  Það er fengið frá Reiknistofu í Veðurfræði, belgingur.is.  Reiknitíminn er 17.03 kl. 00 og gildistíminn er kl. 22 í kvöld (+22t).  Upphafsástand er sótt til GFS í Washington. Þarna má sjá vind og uppsafnaða úrkomu einnar klst.  Grænir litir í ýmsum tónum gefa til kynna úrkomu yfir 1mm eða meira á klst. Falli sú úrkoma sem snjór eins nú á við er 1mm um 1 sm snjólags sé ekki snjófjúk samfara ofankomunni.  Það er ágætis viðmið að gefa sér snjókoma innan við 1mm/klst sé minniháttar og sjaldnast samfelld.

Athugasemdir

[Jón Steinar Ragnarsson, 17.3.2007 kl. 20:44]

Hér á Siglufirði er nú hvassviðri og hríðarmugga, skafrenningur og hvað eina kl: 20:37 í þessum annars lognsæla bæ, sem forðum var þekktur af því að reykurinn af síldarbræðslunni steig einatt beint upp til himins.

Mig langaði að bera undir þig annað mál, og það er áhrif sólbletta á hitastig jarðar og veðurfar. Var að horfa á þessa heimildamynd og langar að átta mig á því hvort hér er um helberan áróður að ræða.  Allavega virðist mér slegið frekar afgerandi striki yfir umhverfisverndarsinna per se án tilltits til margslunginna baráttumála, sem ekki snerta útblástur gróðurhúsalofttegunda.

Annað þarna er lestur úr frægum borkjörnum á Grænlandsjökli. Þar segja þeir að co2 magn aukist í kjölfar hitnunar en ekki öfugt; að 800 ára margin séu þar á milli. Hvað segir veðurfræðingurinn og náttúruvísindamaðurinn? 

[Jón Steinar Ragnarsson, 17.3.2007 kl. 22:24]

Fyrirgefðu...var að rekast á fyrri færslu þína um málið..og ætla að lesa mig til um viðhorf þín.