16,9°C á Sauðanesvita síðasta dag marsmánaðar

Eftir veðurathugun kl. 18 í gær leit listinn yfir hæstu hitagildi dagsins svona út:

• 16,9°C   Sauðanesviti við Siglufjörð
• 16,8°C   Eskifjörður
• 16,8°C   Seyðisfjörður
• 16,1°C   Neskaupsstaður
• 16,0°C   Ólafsfjörður

 

Marsmetið frá 1948, 18,3°C á Sandi í Aðaldal stendur því óhaggað.

Hér er veðurkort þessa dags, 27. mars 1948 og sýnir hitann í 850 hPa fletinum og hæð þess þrýstiflatar.  Staðan er keimlík stöðu gærdagsins, háþrýstisvæði suðausturundan í báðum tilvikum, eindregin S-átt og kjarni heitasta loftsins fer yfir +10°C í þessari hæð.  Munurinn liggur einn helst í því að í gær barst hlýjasta loftið nokkuð hratt norðaustur yfir landið, en þennan ágæta marsdag 1948 voru hreyfingarnar hægari og hlýjasta loftið staldraði heldur lengur við yfir Norðurlandi en í gær. 

 

Auðvitað er það svo varmi loftsins sem nær niður til yfirborðs er háður fleiri þáttum en aðeins þeim hve hlýtt er í um 1500 m. hæð.  Til viðbótar er það styrkur S-áttarinnar og eins hvort rignir í verulegum mæli áveðurs sunnanlands. Þá losar dulvarmi úr læðingi (hnjúkaþeyr) sem getur hæglega skilað sér að fullu niður til yfirborðs staðbundið hlémegin fjalla. Ég hef hins vegar ekki upplýsingar við höndina hve mikið ringdi í magni talið sunnanlands þarna árið 1948.

Athugasemdir

[Ragnar Bjarnason, 2.4.2007 kl. 13:36]

Var á ferðinni í Öxnadal á laugardagskvöldið og það var verulega hvasst og sviptivindasamt efst í dalnum sem og á Öxnadalsheiðinni.