Nor'easter hrellir Bandaríkjamenn

Í gær sunnudag og fram á daginn í dag gekk yfir austurströnd Bandaríkjanna veður af þeirri tegund sem heimamenn kalla Nor'easter.  Um er að ræða lægðamyndun í tengslum við kalt loft í háloftununm sem dengist allt suður undir Mexíkóflóa (sjá kort með næst síðustu færslu minni) og á sama tíma sé hlýtt og rakt loft úti fyrir austurströndinni.  Lægðin dýpkar síðan á leið sinni til norðausturs  skammt úti fyrir ströndinni.  Veður af þessari gerða draga heiti sitt af norðaustanáttinni sem þeim fylgir og er einkenni þeirra hve mikil úrkoman verður gjarnan, oftast snjór enda er Nor'easter vetrarfyrirbæri. 

Lesa má ágæta samantekt af wikipedia hér um Nor'easter ásamt lista yfir þau verstu.

Það þykir því nú skjóta skökku við hversu seint slíkt veður er á ferðinni.  Engu að síður olli það margháttuðum erfiðleikum og tjóni með ströndinni frá Baltimore norðaustur um New York.   

Einkum eru það vatnsflóðin sem fylgja sem valda mestu eignatjóni.  Í New York féllu í gær 140 mm, sem er ekkert smámagn, sérstaklega þegar svo mikið rignir í stórborg.  Menn geta rétt ímyndað sér vandkvæðin við að koma slíkum vatnsflaumi um niðurföll og til sjávar.

Spáð hafði verið hættu á flóðum fyrir helgina og gert að því skóna að flóðin gætu orðið svipuð og þau urðu 1992 (hef ekki kynnt mér þann atburð).  Í raun þóttu þau sambærileg vatnsflaumi þegar fellibylurinn Floyd fór hjá ískyggilega nærri New York í september 1999.

Í veðrum sem þessum er vandinn þríþættur og allt leggst á eitt.  Í fyrsta lagi hækkar sjávarstaðan nokkuð um leið og lægðin fer hjá, bæði vegna lágs loftþrýsings, en einnig staðbundið vegna vindáhlaðanda.  Hækkandi sjávarborð um tíma gerir það að verkum að fljót eins og Hudson áin sem rennur til sjávar við New York hleðst upp og það hratt vegna mikils rennslis vegna úrkomunnar.  Í þriðja lagi er það síðan ofanvatnið sem ekki nær að renna í burtu.

Þannig að það er ekki nóg með úrhellið, ofanvatnið rennur trauðla burt þegar hækkar í sjónum, sem gengur fyrir vikið sums staðar á land og árnar ná þessu til viðbótar ekki að skila af sér sínu aukna vatnsmagni niður fyrir öruggt vatnsborð.  

Veðurfræðingar vestanhafs hrósuðu happi yfir því veður þetta var í apríl en ekki  í febrúar eða mars, því þá fyrst hefði orðið allsherjar óreiða með  mikilli snjókomu,  samgönguörðuleikum.     

Sjá fleiri myndir á vef New York Times, nyt.com                                                                          

Athugasemdir

[Anna Ólafsdóttir (anno) (IP-tala skráð) 17.4.2007 kl. 00:23]

Er þetta eitthvað sambærilegt því sem gekk yfir nálægt síðustu jólum hér fyrir norðan? Það varð að kalla má náttúruhamfaraveður (allavega miðað við aurskriðuna frammi í Eyjafirði og eyðilegginguna af völdum vatnselgsins í Kjarnaskógi) og í því tilviki féll úrkoman sem vatn en ekki snjór á dálítið skrýtnum árstíma.