Óbærilegur hiti í vændum á sólarströndum Spánar

Á veðurvef BBC rakst ég á frétt sem sett var inn í gær þar sem verið er að gera að því skóna að kæfandi heitt loft muni ná til Andalúsíu á Suður-Spáni á næstunni.  Þessi tíðindi eru höfð af blaðamanni af síðu veðurstofunnar spænsku.  Sú síða er hins vegar mér óskiljanleg, þar sem engar upplýsingar eru þar að finna á ensku.

Frétt BBC er hins vegar nokkurn vegin svona:  "Ert þú á leiðinni í sólina á Spáni í sumar ?  Ef svo er ættirðu sannarlega að huga að loftkælingunni því hitabylgja mun ná til suðausturhluta Spánar í sumar.  Miðstöð langtímaspáa Spænsku veðurstofunnar heldur fram að sumarið muni verða markvert heitara syðst á Spáni en að meðaltali.  Tekið skal fram að hitinn gæti orðið svipaður og hann varð í hitabylgjunni sumarið 2003, þegar meira en 4000 manns létust vegna hitanna. Það sumar varð hitinn mestur í Sevillia 45,2°C og í Cordoba, einnig í Andalúsíu þar sem hitinn komst í heilar 46,2°C."

Þetta var fréttin á veðurvef BBC.  Hitinn á Malaga var 33°C í dag.  Fer hann heldur hækkandi í vikunnu skv. spá ECMWF.  Afar heitt er nú í N-Afríku og nær sú molla yfir á Sikiley og Ítalíu.  Þetta má sjá á hitakortum á veðursíðum mbl.is.  Svo er að sjá að þetta heitasta Saharaloft, sem greinilega er grunnurinn að spá veðurfræðinganna spænsku, ætli að ná til Andalúsíu á næstunni hvað svo sem síðar verður þegar komið er fram í júlí.  Sólþyrstir Íslendingar ættu þó að fylgjast með. Sjálfur þekki ég það af þessum slóðum að steikjandi hiti er sínu verri en nístandi vetrarkuldinn hér uppi á Fróni. 

Athugasemdir

[Jón Agnar Ólason, 26.6.2006 kl. 00:01]

haldiði að það verði indælt fyrir verðandi Spánarfara? Að koma heim með húð sem er eins og fitusprengd spægipylsa... luvly.