Sól og sumar fyrir austan meira og minna fram yfir 20. júlí

Þó nú blási af norðri og mikið kólnað á Norðaustur- og Austurlandi gefur ný tveggja vikna veðurspá sem byggð er á mánaðarspálíkani ECMWF sterklega til kynna svipað veðurlag og verið hefur að undanförnu bæði í næstu og þar næstu viku, þ.e. 10. til 23. júlí.  Útreikningar þessir hafa verið gerðir vikulega undanafarin tvö ár eða svo úti í Reading og hef ég fylgst nokkuð náið með þeim lengst af.  Á tímabili í vetur voru þessar spár úti að aka, en síðustu tvo til þrjá mánuði hafa þær farið glettilega nærri raunveruleikanum og á ég þá einkum við seinni vikuna.  Um er að ræða samhæfðt loft- og haflíkan sem keyrt er hvern fimmtudag. Ekki er greint á milli veðurs einstaka daga, heldur er spáð einhverju sem kalla má "einkennisveður" vikunnar.  Eins og oft áður rýndi ég í þau veðurkort sem nálgast má úr keyrslu þessari. Túlkun mín og spá (7.júlí) er því svohljóðandi:

10. til 16. júlí:  Yfir landið fara nokkuð myndarlegar lægðir, nú eða skammt suðurundan.  Gera má ráð fyrir að fremur vindasamt verði þessa vikuna og S- og SA-áttir ríkjandi.  Á milli lægða er reiknað með rólegara og fremur björtu veðri og skammvinn N-átt ekki ólíkleg.  Kaldara en í meðalári SV-lnands og hlýrra norðaustantil.  Þar verður fremur sólríkt en þó einhver úrkoma.

17. til 23. júlí:  Lægðardrög viðloðandi á Grænlandshafi, en háþrýstisvæði viðvarandi yfir Norðursjó og þer í grennd.  Áhrifa þess kemur til að gæta hér með ríkjandi S- og SV-átt.  Við þetta mun hlýna nokkuð í háloftunum sem væri þá  breyting frá fyrri viku.  Hlýtt verður og sólríkt norðaustan- og austanlands, en sólarlítið og fremur kalt suðvestan- og sunnanlands.  Útlit er fyrir heldur meiri úrkomu en í meðalári á Suðurlandi.

Þetta eru nokkuð skýrar línur að þessu sinni í mánðarspánni frá ECMWF.  Hufum það hugfast að þetta er spá, reyndar byggð á bestu líkum, en ekki lýsing á staðreyndum.  Mánaðrspám er ætlað að brúa bilið á milli daglegra veðurspáa  og veðurlagsspáa sem keyrðar eru mun sjaldnar og gilda nokkra mánuði fram í tímann.