Veðursyrpa á þjóðhátíðardegi Bandaríkjanna

Í tilefni af 4. júlí verður í dag litið til tíðarfars í Bandaríkjunum. Á Norðausturströndinni hefur allt verið slétt og fellt þegar veðrið er annars vegar, í það minnsta ekkert sem frásagnar er vert. Það sama er ekki hægt að segja sé farið vestar inn í þetta djúpa og margbreytilega land.

Í Texas hefur um tveggja vikna skeið verið mannskaðaveður. þrumuveður og miklar rigningar staðbundið með tilheyrandi flóðum. Þannig féllu 500 mm á rúmum tveimur sólarhringum í Anderson-sýslu. 11 manns hafa farist í þessum látum.

Í Kalforníu er hins vegar afar þurrt og svo hefur verið undanfarna mánuði. Í Los Angeles hefur úrkoma mælst aðeins 80 mm síðustu 12 mánuði í stað meðaltalsins, 300mm. Langtímaspár gefa til kynna að áfram verði þurrt í Kaliforníu fram á haustið. Að þessum sökum hefur flugeldasýningum vegna 4. júlí víða verið aflýst vegna hættu á skógareldum.

Í Arizona er síðan talsverð hitabylgja. Fólk hefur verið varað við í Phoenix að gæta að sér áður en það heldur í dag út fyrir borgina þar sem von er á einkar glæsilegri flugeldasýningu. Spáð er 45°C hita þarna. Hitasvækjur að sumri verða óvíða meiri í Bandaríkjunum en einmitt í Phoenix og nágrenni. Dæmi er um 50 stiga hita á þessum slóðum (26. júní 1990).

Í New York er veðrið ekki sérlega hátíðarlegt í dag, rigningarskúrir og rúmlega 20 stiga hiti. Og þó, á austurströndinni rignir gjarnan í júlí og meðalúrkoman í New York er ríflega 100 mm í þessum mánuði.

Flokkur: Utan úr heimi | 4.7.2007 (breytt 8.9.2009 kl. 09:37) | Facebook

Athugasemdir

Það eru líklega orðnar þrjár vikur síðan hitinn fór fyrst upp í 45 stig í Phoenix, svo þetta ástand hefur varað í margar vikur. Í Oklahoma hefur líka rignt eins og í Texas, en þó ekki verið flóð. - En það virðist vera að hlýna og þorna þar núna.

Elín Björk Jónasdóttir (IP-tala skráð) 4.7.2007 kl. 14:49