Veðurspá helgarinnar 20. - 22. júlí

Helgarspá Veðurvaktarinnar

 

 

Föstudagur 20.júlí

Það er gert ráð fyrir því að skýjað verði og einhver rigning norðaustan- og austanlands framan af deginum, en síðan rofi mikið til. Vestantil á Norðurlandi og eins suðaustantil verður þurrt og skýjað með köflum.  Úrkomuskil (kuldaskil) ganga hins vegar inn á vestanvert landið um og fyrir hádegi og með eindreginni rigningu.  Hitinn verður á bilinu 11 til 19 stig, einna hlýjast norðanlands og einnig suðaustanlands og á Austfjörðum. Sunnan og  suðvestanátt um 10 m/s vestantil, en annars hægari.  þó staðbundir vindstrengir norðanlands og eins á hálendinu. 

Laugardagur 21.júlí

Skilin verða á leið yfir landið framan af deginum.  Dálítil rigning um miðbik landsins, en vestantil styttir upp að mestu, en þar verður þó víðast skýjað.  Austanlands verður skýjað með köflum eðan víðast alveg þurrt.  Þar gæti orðið einna hlýjast 17-20 stig yfir daginn, en annars má gera ráð fyrir hita 11 til 15 stig, sem sagt fremur milt í veðri þrátt fyrir sólarleysið. Vindur hægur víðast hvar, suðvestlægur í grunninn, en víða hafgola.

 

Sunnudagur 22.júlí

Lægðardrag verður skammt vesturundan og því rigning eða súld frá Snæfellsnesi vestur á firði og áfram yfir vestanvert Norðurland. Um sunnan- og austanvert landið verður þurrt en nokkuð óvissa er með skýjafarið.  Þó líkast til nokkuð bjart austan- og suðaustanlands.  Lítið eitt kólnandi, en þó ekki hægt að tala um annað en að milt verði áfram í veðri.  Hæglætisvindur á landinu öllu.

Vænlegasti landshlutinn: Austurland, Austfirðir og Suðausturland austan Öræfa

 

   Einar Sveinbjörnsson

Athugasemdir

[Valbjörn Steingrímsson (IP-tala skráð) 19.7.2007 kl. 19:26]

Sæll og takk fyri þínar hugleiðingar hér á þessari síðu um helgarveðrið.  Sakna samt pælinga um hálendið.

[Ágúst H Bjarnason, 20.7.2007 kl. 01:14]

Sæll Einar

Takk fyrir veðurspá helgarinnar. Það er vissulega gott að fá smá vætu. Hér á mörkum hálendisins, rétt fyrir sunnan Kjöl, súldaði aðeins fyrir hádegi fimmtudag, en þurrt eftir hádegi.

Nú er það spurningin stóra. Ætti ég að þora að planta 500 bakkaplöntum sem "fóru á hold" vegna þurrkanna miklu? Líklega í lagi miðað við þína spá. ...  "Vænlegasti landshlutinn" skrifar þú. Það fer nú alveg eftir því hvort maður vill vætu eða sól

[Sigurbjörg Sigurðardóttir, 20.7.2007 kl. 08:46]

Takk fyrir helgarveðrið,alltaf gaman að lesa þig.

[Vala Dröfn (IP-tala skráð) 20.7.2007 kl. 13:32]

Er ekki hægt að fá hjá þér veðurspá fyrir alheimsmót skáta?

Kv. Vala.

[Lára Stefánsdóttir, 20.7.2007 kl. 21:26]

Datt í hug að þú hefðir gaman af mynd af rosabaug um sólu (eða heitir hann það ekki?) á Akureyri í dag. Varði stutta stund en mjög fallegur.

[ingi hrafn (IP-tala skráð) 20.7.2007 kl. 23:56]

sæll einar þegar ég sá þessi bólstraský mér fannst þaug falleg. kær kv ingi