Hvar er haustið ?

Ýmsir mælikvarðar eru notaðir til að meta það hvenær komið sé haust.  Á  meðan sumir vilja miða við haustlitina á trjánum eru aðrir sem miða við fyrsta frostið eða hélu á jörðu.  Enn aðrir horfa stíft á almanakið og segja haustið kemur 1. september.

En hér er önnur tillaga. Spákortin hér að neðan eru fengin af veðurvef mbl.is og eru upprunin frá ECMWF í Reading.  Þau sýna hitastigið í 850 hPa fletinum.  Innan bláa svæðisins er hitinn lægri en sem nemur -5°C þarna upp í 1.300-1.500 metra hæð.  Efra kortið hefur gildistíma kl. 06 í morgun (29. ágúst) og við sjáum að blái flekkurinn er langt fyrir norðan land.  Svæðið vex hins vegar mjög að umfangi þessa dagana, enda haustar og að morgni 2. september (sunnudagur) er því spáð að bláa svæði verði komið upp að norðausturströnd landsins.