Hitastig í september eins og í vejulegum júlí

Meðalhitinn hér í Reykjavík til og með 21. september er heil 10,9 stig !  Það er líkt og júlíhitinn á meðalsumri í Reykjavík.  Þetta eru heilmikil umskipti frá september í fyrra, en hann þótti vera í kaldara lagi og var meðalhitinn þá allan mánuðinn ekki nema 6,3°C.

Septembermeðaltalið 1961-1990 er 7,4°C og þó svo að 9 dagar séu eftir af mánuðinum verður að teljast afar líklegt að hann verði nokkuð vel yfir meðallagi. Veðurspár næstu vikuna eða svo eru jafnframt hagstæðar hvað hitastig snertir um suðvestanvert Ísland, áfram austan- og suðaustanáttir.  Þó einhverjar heiðríkjunætur og þá með nokkuð lægri næturhita. 

Fari svo að septemberhitinn í Reykjavík verði yfir 10°C verður hann sá hlýjasti í 10 ár, en 1996 var hitinn 10,4°C.  Bestu septembermánuðirnir í Reykjavík frá upphafi mælinga eru hinsvegar í algjörum sérflokki hvað hita varðar þetta eru árin 1958 með 11,4°C, 1941 með 11,5°C og síðan 1939 með sínar 11,8°C.  Þann septembermánuður var einmunatíð og árgæska til lands og sjávar eða sömu vikur og Þjóðverjar háðu sitt leifturstríð gegn Pólverjum í upphafi síðari heimstyrjaldarinnar.