Veturinn eftir 1. vetrardag

Þó frekar kalt hafi verið síðustu dagana hefur yfirleitt verið sæmilegasta veður yfir miðjan daginn og sólin yljað lítið eitt sunnanlands og vestan.  Á hálendinu, t.d. á Kárahnjúkum hefur hitinn hins vegar ekkert komist upp fyrir frostmarkið eftir að kólna tók um síðustu helgi.  Þó sýnist mér í fljótu bragði að frostið hafi enn hvergi náð 10 stigum enn sem komið er.  Það kann þó að breytsta næstu daga.

Kortið hér til hliðar (smellið og stækkið) er spákort fyrir mánudag kl.12 fengið frá Washington og sýnir það hitastigið í 850 hPa hæðarfletinum, en hann er allajafna í um 1.200 til 1.400 metra hæð. Kalt loft er á ákveðinni suðursiglingu austur af Grænlandi í áttina að Íslandi.  Þessi þróun er afleiðing annarra viðburða á veðurkortunum þessa dagana sem ná yfir mun stærri hluta norðurhvels jarðar.

Á kortinu að neðan sem er veðurgreining dagsins kl. 12 frá sama uppruna og sýnir þrýsting við yfirborð og hæð 500 hPa flatarins.  Þar er eftirfarandi atugunarvert:

1.  Yfir Grænlandi er svokölluð fyrirstöðuhæð. Hún er hlý í grunninn, loftið ættað langt sunnan úr hafi eins og appelsínuguli liturinn gefur til kynna.

2.  Fyrirstöðuhæðiin hefur verið á þessum slóðum í upp undir viku.  Hún lokar fyrir innstreymi af hlýju lofti úr suðvestri og  suðri í áttina til Íslands.  Dökkgræna strikið á að sína þessa hindrun.

3.  Hæðin hefur þriðju afleiðingarnar í för með sér sem eru þær að hún beinir köldu lofti norðan úr Ísahafinu suður á bóginn.

4.  Að þessu sinni er djúp lægð yfir Barentshafi.  Staðsetning hennar er mikið til fylgifiskur og þá afleiðing þessarar veðurstöðu.  Lægðin hjálpar mikið til við að koma kalda loftmassanum suður á bóginn.

5.  Megin lægðabrautin með röku og hlýju lofti er langt suður í Atlantshafi.  Úrkomusamt er því á meginlandi Evrópu.  Jafnframt ríkjandi og nánast eigngöngu vindáttir frá austri til norðurs á Íslandi.

Nú lítur sem sagt út fyrir það að kaldasti kjarni þessa loftmassa úr norðri lendi á okkur á þriðjudag og miðvikudag.  Þá er næsta spurning sú hversu kalt það verði.  Svarið gæti verið að frost merði um tíma meira en 10 stig á hálendinu og innsveitum sérstaklega ef skjólsælt verði.  vægt frost á laglendindi allstaða að næturlagi, en klökknar rétt svo meða suðurströndinn yfir daginn.

Veðurbloggið fylgist spennt með.