Snjóað í allan dag fyrir norðan

Svo er að sjá sem að það hafi snjóað töluvert fyrir norðan í dag (30. mars).  Skil lægðar komu úr austri og hafa verið að þokast til vesturs norðantil á landinu.

Á Akureyri hefur verið gefin upp í veðurathugum snjókoma með takmörkuðu skyggni látlaust frá því snemma í morgun.  Snjóflóð féllu á veginn á milli Dalvíkur og Ólafsfjarðar og þannig mætti áfram telja.

Kortið sem hér fylgir með er úr safni Belgings og gildir kl. 18.  Samkvæmt því átti ofanhríðin að vera þó nokkuð áköf eða 4 til 5 mm/ á 3 klst. í fjallendi Tröllaskagans og í Kinnarfjöllin.  Úrkomumagnið mælist ekki alltaf vel en fróðlegt verður að sjá aukningu snjódýptar í fyrramálið.

Færð á Norður- og Norðausturlandi hefur að vonum verið frekar slæm.  Meðan tíðin er með þessum ósköpum er vart hægt að tala um að vorið sé á næsta leyti.  Samt sem áður lýkur skilgreindum vetri Veðurstofunnar á morgun 31. mars.  Það eitt er þó engin trygging fyrir bættu veðri.  Þó er útlit í kortunum að eitthvað nái að hlýna og blota um miðja vikuna, a.m.k. um tíma. 

Athugasemdir

[svp (IP-tala skráð) 31.3.2008 kl. 20:55]

Já, nú verður gaman að sjá hvort spá öldungadeildarinnar á Dalbæ stenst. Þar var gefið út í dag að þessi vika yrði svipuð þeirri síðustu en síðan myndi hlýna og apríl verða notalegur utan eitt skot undir lok mánaðarins.

[Einar S Einarsson (IP-tala skráð) 2.4.2008 kl. 11:48]

 Ég hef oft velt því fyrir mér hvers vegna íslenskar veðurfréttir innifela ekki í sér vindkælingarhitastig.  Flestar erlendar veðursíður eru með bæði hitastig og vindkælingu.  Eftirfarandi var tekið af weather.co.uk áðan og sýnir stöðuna í Reykjavík kl 11:00 í dag 2.apríl.  Töluverður munur er hér á hitastigi og vindkælingarshitastigi.  Er einhver skýring á þessu?

0°C

   Feels Like -7°C