"Vorið kallar"

Í annað sinn á nokkrum dögum, snjóar suðvestanlands í þeim mæli að alhvítt verður og gott betur en það.  Það sem af er þessum aprílmánuði hefur verið ríkjandi aðstreymi lofts úr norðaustri.  Það hefur verið frekar svalt, en alls ekki kalt.  Smálægðir á Grænlandshafi ber með sér raka í vega fyrir þátt svala loft og því snjóar.  Reyndar má færa fyrir því ágætis rök að úrkoman hefði falið sem rigning í bæði skiptin hefðu bakkarnir borist inn yfir land að deginum eða ekki  á kvöld og nætur lagi.  Dægursveifla hitans er orðin það mikil að hún hefi í þessum tilvikum skipt sköpum.

Nokkuð hjákátlegt var því í morgun þegar blöðunum var flett (reyndar laugardagblöðum) að sjá opnuauglýsingar frá bæði Húsasmiðjunni og BYKO, önnur undir fyrirsögninni VERTU TIL VORIÐ KALLAR.  Fyrst og fremst er það fyndið þennan snjókomumorgun að sjá tilboð um mosatætara og kalk á grasflatir.  Sérstaklega slær auglýsingin í gegn þar sem stendur: Hægt er að bera á pallinn við lágt hitastig !!.  Ekki veit ég hvað byggingavörurisarnir hafa kostað til fyrir þessa vorlegu auglýsingaherferð í því skini að fá fólk til að hefja vorverkin.  

Auðvitað er það svo að sum árin hefur tíðin verið með þeim hætti að auglýsingar sem þessar hafa átt vel við.  Nú hins vegar hefur þetta veðurlag með ríkjandi NA-átt og fremur svölu veðri verið ágætlega fyrir séð í nokkurn tíma og ekkert bent til þess með 7 til 12 daga fyrirvara að breytingar væru í aðsigi, eins og þær sem í vændum eru á þriðjudag þegar mun mildara loft berst hingað úr suðri.  Jafnframt er eru verulegar líkur á því að háþrýstingur fyrir suðaustan- og austanlandið og öllu veldur tjaldi ekki til einnar nætur og loft suðlægrar ættir verði hér viðvarandi í nokkurn tíma.  Tölvulíkönin hafa náð þessari breytingu ágætlega, tíma og stærð hennar nú í yfir viku tíma.  

Athugasemdir

[Theódór Norðkvist, 13.4.2008 kl. 16:29]

Veðurfarið stjórnast ekki af prentunaráformum byggingarvörurisanna á auglýsingapésum, það er nokkuð ljóst! En hvenær kemur sumarið annars, eða kemur það? Það var einkennilegt að líta út um gluggann í morgun og sjá alhvíta jörð.

Takk annars fyrir skemmtilegan og fræðandi pistil. 

[Valgeir Bjarnason, 13.4.2008 kl. 17:53]

Það þarf enginn að örvænta með vorkomu þótt snjói svolítið í apríl. Annað eins hefur nú gerst.

Annars vil ég helst hafa apríl frekar kaldan en maí afturá móti hlýan. Hitakast í apríl getur platað jarðargróða, einkum þann innflutta, garðagróður og tré, þannig að hann rýkur af stað en getur svo kalið í byrjun maí, komi kuldakast. Þannig aðstæður sköpuðust síðast árið 2003, þá var apríl hlýr og fóru tré t.d. lerki af stað og voru orðin vel græn í lok mánaðarins. Í byrjun maí það ár gerði frost í nokkra daga og þá kólu þessi tré og voru brúnleit það sem eftir var sumars. Sumarið 2003 var aftur á móti eitt hlýjasta sumar hérlendis síðan mælingar hófust.

Kveðja,

[Sigurður Þór Guðjónsson, 13.4.2008 kl. 17:58]

Auglýsingar um vorið í útvarpinu í dag fannst mér hjákátlegar.

[Sigrún Björgvinsdóttir, 13.4.2008 kl. 21:39]

Ég þakka fyrir svona fallega vorspá. Valgeir sagði það sem ég var að hugsa. Svo svalur apríl minnkar líkurnar á að nýskógarnir okkar verði fyrir skakkaföllum í maí. En af því að páskarnir voru svona snemma ruglumst við í ríminu. Við höldum nefnilega að vorð komi eftir páskana.  Og öll þessi hret sem eiga að koma á .þessum tíma hafa líka ruglast. Það hefur eiginlega orðið eitt samhangandi hret hingað til. Nú þarf ég aðeins að bíða þar til að þriðjudag, er það ekki.

Hamros

[Jóhann Grétar Kröyer Gizurarson (IP-tala skráð) 14.4.2008 kl. 08:21]

Breska veðurstofan spáir góðu sumri þrátt fyrir fremur svalt vor þar í landi (snjóaði í London 5. Apríl, sem MJÖG óvenjulegt). Sumarið þar er sagt verða það hlýtt skv. tölvulíkönum að taldar eru miklar líkur á því að hitametið 38,3 C° sem er hæsta tala sem sést hefur á Bretlandseyjum, verði betrumbætt. Svo vonum við bara að eitthvað af þessum hlýindum nái hingað :)

[Aðalsteinn Guðmundsson (IP-tala skráð) 14.4.2008 kl. 09:19]

Þessi langvarandi kuldatíð afsannar bara þá kenningu að það sé að hlýna í veðri.  Það er þýðingarlaust að reyna að halda þeirri bábylju fram að það sé að hlýna, því ýmislegt bendir til annars.  Margt bendir til að alheimshlýnunin hafi náð hámarki árið 1998 og síðan hafi farið kólnandi. 

Veðrið nú í ár minnir um margt á veðrið árið 1979 sem var kaldasta ár á Íslandi á 20. öldinni.  Reyndar er ekki hafís núna eins og þá, en hinsvegar eru þrálátar norð-austlægar áttir.  Einnig svipar veðrinu núna mikið til veðursins árið 1988. Stuttur hlýindakafli á að koma í miðri vikunni, en þegar líður að helginni á gamanið að vera búið og áframhaldandi kuldatímabil nær yfirhöndinni aftur um ókomna framtíð.

Sé tekið mið að veðrátunni eins og hún var árin 1979 og 1988, má búast við köldu og röku sumri nú í ár, gangi þessi "fylgni" eftir.  Sumarið 1979 var með abrygðum kalt og sólarlítið.  Sumarið 1988 var líka svalt, sólarlítið og vætusamt. 

Ætli Gore hafi áhuga á að eyða sumrinu hér á landi í ár?  Kannski að það yrði til þess að hann myndi breyta um skoðun varðandi hlýnun Jarðar.  

[Þórhildur Daðadóttir, 14.4.2008 kl. 11:57]

Foreldrar mínir sem búa á Selfossi hafa þegar hafið vorverkin og eru byrjuð að klippa limgerði og tæta mosa. En hér á Héraði er ekki nokkur ástæða til að byrja nokkur vorverk.  Hvít sæng yfir öllu og einstaka steinstindur stingur upp kollinum.  Nei, hér er sko ekki komið sumar.  En þó er vorveðrið mjög milt og gott.

[Einar Sveinbjörnsson, 14.4.2008 kl. 12:51]

Tíðin nú á ekkert skylt við þann kulda sem við upplifðum vorið og veturinn 1988 og þaðan af síður 1979 sem Aðalsteinn bendir réttilega á að hafi verið afbrigðilegt.  Meðalhiti vetrarmánaðanna jan-mars var í ár 0,2°C í Reykjavík.  Vissulega ekki verið kaldara frá 2002.  En 1988 var meðalhiti þessara sömu mánaða -1,5°C og 1979 -2,7°C.   Ef horft er til hitafars það sem af er aprílmánuði í Reykjavík að þá var fyrri helmingur mánaðarins mun hlýrri í fyrra, en árin tvö þar á undan (2005,2006) reyndust mun kaldari þegar horft er eingöngu til fyrri helmings apríl.

Tíðafarið nú og meintur kuldi er því huglægurog hefur N-áttin oft verið þrálátari og mun naprari á áliðnum vetri.