Þá er það veðurlagsspáin nóvember til janúar.

Nú er ekki úr vegi að koma með veðurlagsspá næstu þriggja mánaða, nóvember til janúar Um er að ræða veðurlagsspá byggða á útreikningum ECMWF í Reading.  Um grundvöll slíkra veðurspáa hef ég skrifað áður

Það er sjá sem að það verði meira en 60 % líkur á því að hitinn verði í efsta þriðjungi  þ.e. markvert  hlýrra en í meðalári um land allt og yfir 70% líkur norðvestantil á landinu. en 60-70% suðvestantil og á hálendi landsins. Að sama skapi benda reikningar til þess að  innan við 10% líkur séu á því að hitastigið verði í lægsta þriðjungi. Og þá að sama skapi 20-40% á að hitinn verði í þeim hitaþriðjungi rétt við meðaltalið.

Sé rýnt í úrkomuspánna kemur í ljós að horfur eru á því að 50-60% líkur verði á því að úrkoman sunnantil á landinu verði í heildina séð í efsta þriðjungi.

Í Colombia háskólanum í New-York fylki eru gerðar sambærilegar spár.  Þeirra spá nú gefur einnig til kynna meiri líkur á því að hitinn verði í efsta þriðjungi, en í mið- eða lægsta þriðjungi.  Hins vegar gefa þeirra útreikningar ekki tilefni til líkinda á úrkomufrávikum hér við land.  Það er reyndar frekar venja hjá þeim en hitt einhverra hluta vegna 

Frávikamunstur sem þetta í hita og úrkomu gæti bent til þess að næstu þrjá mánuði sjáum við aukna tíðni sunnan- og suðaustanáttar á kostnað norðan- og norðaustanáttar.    

Út frá þessum tveimur spám má segja að meiri líkur séu á mildu veðri en köldu þá þrjá mánuði sem vetrarmyrkrið er mest. Mikilvægt er að hafa í huga að átt er við þetta þriggja mánaða tímabili í heild sinni og sveiflur á milli daga og vikna munu að sjálfsögðu koma fyrir.  Þannig útilokar veðurlagspá sem þessi alls ekki kafla og kafla  með kaldri norðanátt.  En S-lægu áttirnar verða engu að síður ríkjandi ef spá ECMWF er túlkuð til fulls.

Kortið sem fylgir með er frá norsku veðurstofunni og er ætlað að sýna hitafrávik í gráðum fyrir norðurslóðir, en ekki í líkum á hitaþriðjungum.  Það er einnig gert með hliðsjón af spá ECMWF.