Mælingar á hita verða að vera við staðalaðstæður

Þessi ágæta veðurathugunarstöð í Suður-Þrændalögum  í Noregi komst í  veðurfréttirnar þar í landi fyrir  skemmstu.  Tvo sólríka daga reyndist stöðin Kotsöy hafa mælt hæsta hitann í landinu og þótti Þrændum mikið til koma.

Norska Veðurstofan birti hins vegar tilkynningu í kjölfarið þar sem mælingarnar voru dregnar til baka og ekkert væri í raun að marka þær.  Ekkert var þó að mælitækjunum og hitamælirinn er þarna í réttri hæð frá jörðu, þ.e. í tveimur metrum.  Aftur á móti má sjá á myndinni að nánasta umhverfi er nokkuð hrjóstrugt og ógróið.  Ástæða þess er þú að stöðin er nýleg, var sett upp sl. haust eftir að snjóað hafði.  Reglur segja að hitamælingar skuli fara fram á stað sem er grasi gróinn.  Moldarflagið sem þarna er gleypir í seg varma sólar og hefur áhrif á hitastigið í loftinu í næst nágrenni.

Mælingarnar voru einfaldlega ekki gerðar við staðalaðstæður, en Norska Veðurstofan segir túnþökur vera á leiðinni. 

Athugasemdir

[Sigurður Þór Guðjónsson, 6.6.2008 kl. 00:57]

En hvað með veðurstöðina á Akureyri? Er búið að tyrfa yfir malbikið?!

[Axel Valur Birgisson (IP-tala skráð) 6.6.2008 kl. 09:33]

Og hvað með veðurstöðina á Húsavík sem er inn í skógi? Teljast það vera staðalaðstæður?

[Ágúst H Bjarnason, 6.6.2008 kl. 11:47]

Það er er mjög víða pottur brotinn í þessum málum. Í Bandaríkjunum hefur komið í ljós að fjöldinn allur af stöðvum er fjarri því að vera við staðalaðstæður. Það sem er öllu verra er að þetta á við um stöðvar sem eru í neti USHCN (U.S. Historical Climatology Network) sem m.a. eru notaðar við mælingar á loftslagsbreytingum.

Vefsíðan www.surfacestations.org sýnir þetta vel, en þar er haldið utan um gæðamat á þessum stöðvum. Það kemur á óvart að það eru áhugamenn sem hafa tekið þetta að sér, og þegar kannað 534 USHCN stöðvar, eða um 44% USHCN stöðvanna. Aðeins 4% þeirra reynast uppfylla allar kröfur um staðaðstæður (CNR=1).

Havð finnst mönnum t.d. um svona fyrirkomulag? (Myndin er frá surfacestations.org, en þar er fjöldi hliðstæðra mynda).