September er sumarmánuður

Það hefur verið sumarhiti það sem af er septembermánuði.  Í fyrrakvöld var ákaflega notalegt og hitinn bara hækkaði eftir því sem haustmyrkrið sótti á.  Um kl 21 sýndi mælirinn +14°C.  Á sama tíma sá ég á veðurkortinu að mikið rigndi fyrir austan.  Við hér á vestanlands fengum að njóta hnjúkaþeys reyndar í hálfgerðu logni á höfuðborgarsvæðinu.  En dulvarminn var vissulega ósvikinn og afleiðing rakaþéttingarinnar  fyrir austan. 

Ég tjáði blaðamanni Morgunblaðsins sem hafði samband fyrr í dag forviða út af hlýindunum að meðalhiti fyrstu 11 daga september væri 10.8°C eða vænn sumarhiti ef út í það er farið. Örlítið lægri hiti a Akureyri  eða 10.4°C.  Þrátt fyrir að fólki finnist hlýtt þessa dagana er ekkert óvenjulegt á seyði.

Ýmist er september hlýr eða kaldur.  Í fyrra og árið þar áður voru hlýindi framan af, en 2005 kólnaði fyrr eða þegar vika var af ágúst og hélst svo meira og minna út september.  Fyrstu 11 dagana  gæðasumarið 2003 var markvert hlýrra en nú sérstaklega á Akureyri þar sem hitinn þessa daga var á við það sem best gerist í júlí eða 12,5°C.  Enn hlýrra var síðan 1996.  Í Reykjavík fór september að stað með látum hvað hita varðar 1968 og eins 1958.  

Það er eins og það skiptist í tvö horn hvað þennan árstíma varðar;  annað hvort heldur sumarið einfaldlega áfram eins og ekkert hafi í skorist og hitinn lækkar lítt frá ágúst eða þá að haustið heldur innreið sína með næturfrostum og svölum dögum.  

Í ár er greinilega tími sumaraukans og við bíðum því enn næturfrosta og hvítra kolla á fjöllum.  

Veðurstofan flokkar september með sumarmánuðum.  Síðan kemur haust í október og vetur ekki fyrr en í desember og hana nú !

Ljósm:  Rifs í sepemberlok 2006.  Guðlaug Helga Kristinsdóttir 

Athugasemdir

[Gunnar Th. Gunnarsson, 13.9.2008 kl. 02:13]

Guð blessi gróðurhúsaáhrifin!

[Gísli Hrafn Atlason (IP-tala skráð) 13.9.2008 kl. 02:28]

...og mér sýnist að þessir síðustu hlýindadagar hafi klárað snjó í Esjunni. Sé reyndar ekki nógu vel en skaflinn sem skiptist í tvennt í hlýindunum í júlí virðist loks hafa horfið.

Kær kveðja

[Haraldur Bjarnason, 13.9.2008 kl. 08:53]

Einar einhverra hluta vegna finnst mér að september hafi verið einn besti sumarmánuðurinn á Austur- og Noðurlandi síðustu árin. Hefurðu skoðað það?

[Sigurbjörn Friðriksson, 13.9.2008 kl. 16:33]

Nú skilur maður útlendingana sem sækjast í hópum að flytjast til landsins og gerast nýbúar á Íslandi.  Þetta er eina landið þar sem lífsviðurværin breytast nánast eingöngu til batnaðar vegna hlýnunar jarðar (Global Warming).  Ég vorkenni eingöngu nágranna mínum sem á snjósleða sem hann keypti nýjan fyrir nokkrum árum síðan og hefur enn ekki getað notað snjósleðann af nokkru viti.  Nú grætur hann söltum tárum yfir honum hvern veturinn á fætur öðrum.

Svo hefur septembermánuðurinn alltaf verið fallegasti mánuðurinn þegar trén taka að fölna, og áður en haustvindarnir fara að blása laufin af að nokkru viti, þá er trjágróðurinn svo dásamlega fallegur.  Þingvellir eru t.a.m., alveg einstaklega fallegir yfir septembermánuð og taka breytingum dag frá degi.  Svo er alltaf gott að fá svalann eftir hlýtt sumarið.  Gleðilegt haust!

Kær kveðja, Björn bóndiïJð

[Sigurður Þór Guðjónsson, 13.9.2008 kl. 17:13]

September er allra mánaða viðkvæmastur. Kaldur og hryssingslegur september, eins og var venjan í áratugi svo að segja, er algjör viðbjóður en hlýir og góðir septemberdagar, sérstaklega bjartir og hlýir dagar seint í eptember, eru allra daga fegurstir og minna á músik eftir Mahler eða eitthvað.

[Júlíus Þór Eysteinsson (IP-tala skráð) 14.9.2008 kl. 15:39]

September er "REGNMÁNUÐUR" og ætti að kallast það, en ekki September.  Það á eftir að rigna allan september í ár eins og í fyrra.  Undarlegt hvernig veðráttan getur endurtekið sig ár eftir ár.  Það er engu líkara að árið 2007 sé komið aftur.

[Gunnar Th. Gunnarsson, 14.9.2008 kl. 15:55]

Ef ég man rétt þá er september næst þurrasti mánuður ársins á Íslandi, á eftir maí.

[Sigurbjörn Friðriksson, 14.9.2008 kl. 16:34]

Í "den" þá fannst mér maí vera fallegasti og besti mánuðurinn, því með honum komu fyrstu hlýindin svo nokkru nam og grassprettan til viðbótar blessaðri birtunni sem var þá þegar orðin þó nokkur frá vorjafndægrum hinn 21. mars.  Hinsvegar, þá fer ég ekki ofan af því, nú á gamals aldri eða þannig sko, að nú finnst mér september vera enn sá jafn-fallegasti hvað litabrigðin varðar.  Svo þegar maður fór að veiða gæsina og í þá tilð voru einstaka frostdagar í september, sem er að mestu hætt núna.

Kær kveðja, Björn bóndiïJð Munið bloggsíðuna; http://blekpennar.com

[Júlús Th. (IP-tala skráð) 15.9.2008 kl. 08:51]

Sæll, Gunnar Th.

Ef september er næst þurrasti mánuður ársins, þá er semsagt steypiregn alla hina mánuðina að maí undanskyldum.

[Áskell Örn Kárason (IP-tala skráð) 15.9.2008 kl. 16:47]

Fyrir okkur Norðlendinga verður þetta haust æ hlýrra sem á líður. Með sama áframhaldi ætti október að fara yfir 12 stig! Að september hálfnuðum sýnist mér meðalhitinn vera 10,9 stig, sem er þokkalegur júli-ágúst hiti. Enn frostlaust og berin að þorna upp áður en þau ná að frjósa. Gangnamenn í vandræðum því féð er illrækt í 15+, vegna mæði!