Gríðarlegt úrhelli í Grundarfirði

Það er varla að maður trúi þessum tölum, ef þær eru réttar er úrhellið gríðarlegt í Grundarfirði.  Allt að 18 mm á 1 klst og 13 á þeirri næstu er meira en góðu hófi gegnir.  Vissulega er það vel þekkt hve mikið getur rignt í Kolgrafarfirði og  Grundarfirði þegar  hann er mjög hvass að sunnan um leið og skil ganga yfir.

Það er ekki ná með að himnarnir steypist yfir Grundfirðinga, heldur er þar líka foráttuhvasst eins og sjá má á meðfylgjandi töflu af vef VÍ.  Ég ætla ekki að útiloka að hin mikla veðurhæð geti truflað mælingarnar í sjálfvirka úrkomumælinum á Grundarfirði.  En þrátt fyrir það veit ég að fyrri reynslu að þar rignir mikið þessa stundina eða rétt fyrir miðnætti.

Viðbætur:  Sama tafla fyrir Ólafsvík sýnir svipaða mynd eða allt að 20 mm á klst. 

Athugasemdir

[Þorkell Guðbrands (IP-tala skráð) 17.9.2008 kl. 06:51]

Hafandi alist upp í Ólafsvík og búið í Grundarfirði um tíma, þá þykir mér þessar tölur fráleitt ólíklegar. Hinsvegar þekkir maður alls ekki sjálfvirka úrkomumæla, né hvernig þeir bregðast við miklum veðraham. Hef hinsvegar kynnst nokkuð "venjulegum" mælum og veit af reynslu að þeir geta mælt of lítið í miklu hvassviðri. Ekki á það síst við í snjókomu. En þetta þekkið þið veðurfræðingar auðvitað öðrum betur. Hér í Skagafirði var mjög hvasst um tíma í nótt, sérstaklega milli 02:00 og 04:00 fannst mér. Sjálfvirkur mælir á Alexandersflugvelli staðfestir það.