Yfir 200 mm í Henglinum

Sæmileg mynd er nú að koma á uppgjör úrkomu síðasta sólarhringinn.  Í sjálfvirka mælinn í Ölkelduhálsi á Hellisheiði eða Henglinum eftir því hvernig á það er litið féllu 201 mm í mælinn frá kl. 9 í gærmorgun þar til kl. 9 í morgun.  Línurtið sýnir að það rigndi látlaust og af svipuðum ákafa frá því um kl. 14 í gær og þr til um 5 í morgun þegar stytti upp að mestu.  Ákefðin samsvarar því um 13 mm á klst allan þann tíma sem rigndi.

Þessar tölur eru svo sem í hærri kanntinum, en í fyrrahaust, í einni af stórrigningunni sem þá gerði í september komu 220 mm í mælinn (27. sept 2007) eins og lesa má um hér. 

Bláfjöll og Andakílsárvirkjun eru með um 160 mm og 130 runnu í mælinn á Kvískerjum.  Þar rigndi enn af krafti kl. 9 í morgun, þegar mælt var. Í samantekt dagsins á vef Veðurstofunnar vantar enn Ólafsvík og Grundarfjörð, en mæling á mannaðri stöði, Setbergi  í Eyrarsveit, sýndi 100 mm.  

Þær tvær stöðvar sem mæla í Mýrdalnum sýna að úrkomumagnið þar varð nokkru minna en búast hefði mátt við.  

 

Athugasemdir

[Matthías Arngrímsson (IP-tala skráð) 17.9.2008 kl. 14:23]

Sæll vertu Einar.  Þetta er mjög fróðlegt.  Hvaða áhrif heldurðu að þessar tölur hafi á möguleika á flugvelli á Hólmsheiði?  Svo hef ég verið að efast um að hermilíkan dugi til mælinga þar.  Hefurðu einhverja skoðun á því?  Skilst að Haraldur Ólafsson veðurfræðingur hafi sjálfur viðurkennt að það sé ekki fullnaðarmæling að nota slíkt hermilíkan, ólíkt því sem Samtök um Betri Byggð halda fram.  Hvað eru annars margir í þeim samtökum, og hvar er þeirra heimili og varnarþing, félagaskrá, heimasíða?  Grunar að þetta sé fámennur en hávær hópur.....  Vonandi geturðu varpað ljósi á þessi mál og svarað spurningum mínum.

[Örn J. (IP-tala skráð) 17.9.2008 kl. 21:26]

Er hægt að rigna nánast endalaust eins og núna og í fyrrahaust.  Hefur verðurkerfið breyst hér á landi að vera síbreytilegt yfir í að vera mjög stöðugt eins og virððist vera núna?  Getur þú svarað þessu Einar, eða svarar þú ekki svona spurningum á bloggsíðu þinni?

[Einar Sveinbjörnsson, 18.9.2008 kl. 00:12]

Breytileikinn í veðrinu kemur fram á mismunandi tímakvörðum.  Á kvarðanum dagar til vikur hefur veðráttan verið frekar stöðug upp á síðkastið, þ.e. lægðagangar við landið og  ríkjandi vindar á milli  SA og SV.  Í slíku stöðugu veðurlagi er samt mikill breytileiki á styttri tímakvarða á milli tveggja daga eða innan sólarhringsins.  Veðurlagið sem við getum kallað á tímakvarða dagar til vikur á sér vissulega margar myndir.  Oft skiptir um veðurlag ótt og títt og ræðst það af því hvað er að gerast í brautum lægðanna og stærri veðurkerfa. Í fyrrahaust hélst svipað veðurlag nær óslitið frá áliðnum ágúst fram í desember (nokkuð einfölduð mynd), en haustið 2006 var breytileikinn miklu mun meiri. 

Hvort það sé einhver mælanleg þróun í lengd veðurlagstímabila eins og Örn J hefur áhuga á að vita að þá treysti ég mér ekki til að fullyrða neitt um þá hluti. En slíkar athuganir væru verðugt rannsóknarefni.  Það yrði sennilega nokkuð stórt í sniðum, því ekki er nóg að skoða Ísland og nánasta umhverfi þess, heldur yrði allt N-Atlantshafið undir og sennilega allt norðurhvelið norðan 30. breiddargráðu. Langar bylgjur, sk. Rossbybylgjur sem ferðast frá vestri til austurs umhverfis norðurhvelið (samsvarandi á suðurhveli) ráða miklu um veðurlagið, bylgjulengd þeirra ölduróf og bylgjubrot, en þeir þættir stjórnast m.a. að mishitun stórra haf -og landsvæða.  Það er með öðrum orðum ekki alltaf augljóst hvað veldur þegar eitt veðurlagið hér hjá okkur tekur við af öðru og þá jafnframt hvað hið nýja verður ríkjandi um langan tíma.