Illa farnar aspir í Keflavík

Ásbjörn Eggertsson í Keflavík sendi mér þessar myndir sem sýna vel hvað seltuveðrið í síðustu viku fór illa með aspir í garði hans.  Sláandi er að sjá hvernig laufið hefur farið og  þann mun á sama trénu á því sem var áveðurs fyrir suðvestanáttinni og þeim hluta sem var hlémegin.  Áveðurs er laufið allt innþorðað og eins og það sé brennt en lítið sér á því laufi sem hefur staðið í skjóli.  Sökin er ekki bara seltunnar í lofti, heldur var blásturinn líka ákaflega þurr af hafi og aspir eru sérstaklega viðkvæmar fyrir þurrum vindum og mikilli útgufun vatns um laufblöð.

Þakka Ásbirni kærlega fyrir þessar athyglisverðu myndir.

Athugasemdir

[Ágúst H Bjarnason, 23.9.2008 kl. 11:49]

Þegar ég ók í uppsveitirnar s.l. laugardag tók ég einmitt eftir þessum lit á öspunum nærri Reykholti. Var þar síðast á ferð viku áður, en þá sá ég ekki betur en allt væri nokkurn vegin eðlilegt miðað við árstíma.  Mér datt í hug að þetta væri asparryðinu að kenna og datt ekki í hug selta.

Tók líka eftir að í plaskassa nærri kofanum mínum hafði safnast 145 mm af regnvatni á einni viku, og Brúará var hálf mórauð.