Loks styttir upp í henni Reykjavík

Nú kl. 9 að morgni 24. sept. hefur loks stytt upp í Reykjavík.  Fram að því hafði rignt látlaust án uppstyttu í rúman sólarhring eða frá því um kl. 5 í gærmorgun.  Úrkomumagnið var svo sem ekkert ofboðslegt eða um 20 mm.

Reykjavík er ekki þekkt fyrir stórrigningar, enda nýtur höfuðborgarsvæðið úrkomvars frá Reykjanesfjallgarðinum og Hengli. Til samanburðar komu á sama tíma og og yfir 140 mm í mælinn í Bláfjöllum.  Yfirlitt rignir því frekar lítið í einu í Reykjavík og oftast með uppstyttum.  Ég man vart eftir því að rignt hafi án þess að stytt hafi upp eina einustu stund þetta lengi á þessum slóðum. Held þá utan við þann samanburð létta súld sem fylgir oft þokulofti og liggur yfir svo dögum skiptir, gjarnan að haustlagi.  Sú úrkoma bleytir og finnst greinilega, en mælist hins vegar mjög lítil í magni talið.

Það voru hitaskil sem nálguðust frá vaxandi lægð hér í gærmorgun og frá þeim rigndi stöðugt.  Þau fóru yfir um  hádegi, við það hlýnaði um 3°C eða svo, en áfram rigndi frá skýjum í hlýja geira lægðarinnar, uns kuldaskilin nálguðust í gærkvöldi. Þau voru síðan að lulla sér til austurs í alla nótt.  

Myndin er fengin af vef mbl.is (klippt út úr netfrétt Þóru Kristínar Árnadóttur um rigninguna.)

Athugasemdir

[OliStef (IP-tala skráð) 25.9.2008 kl. 13:08]

Takk fyrir mjög fræðandi lesningu. Það ætti að gera bloggið þitt að skildulesningu í náttúrfræði í skólum - engar kennslubækur koma efninu svona vel til skila.

[Ómar Fr. (IP-tala skráð) 25.9.2008 kl. 21:29]

Já, loksins styttir upp.  Það var mikið.

Þetta drungalega haustveður sem búið er að vera allt síðsumarið og það sem af er hausti líkt og í fyrra, gerir það að verkum að síðsumur og haust eru orðin leiðinlegasti tími ársins.

[Sigurður Þór Guðjónsson, 27.9.2008 kl. 19:29]

Þetta eru bara tvö tilvik en mörg síðustu ár hefur síðsumarið og haustið oft einmitt verið einhver besti tími ársins, sumarblíða stundum langt fram í október.