Úr sumri beint í vetur !

Erum við að sigla inn í haust laust ár ?  Vitanlega er þetta orðaleikur, en vel mætti halda að svo væri.  Svo snögg eru umskiptin nú þennan síðasta dag september og þaðan fyrsta í október.  Eftir afar mildan og hagfelldan septembermánuð, sérstaklega fyrir norðan fram yfir þ. 25. dembist nú yfir okkur vetrarlegt loft úr norðri með snjókomu og frosti norðan- og austantil.

Á meðfylgjandi kortum af vef mbl.is tákna blái liturinn eins konar vetur.  Þar er um að ræða kaldara loft en sem nemur -5°C í 850 hPa fletinum eða í um 1.300 til 1.400 metra hæð. Venjulega táknar framrás þessa lofts hita um frostmark á láglendi þegar geislun sólar nýtur ekki við.  Það væri ekki til frásagnar sæjum við "bláa" loftið slengjast yfir landið í einn dag, jafnvel tvo.  Meinið er hins vegar samkvæmt tölvuspánum að kalt loft virðist ætla að verða hér nokkuð þaulsetið næstu daga með heldur lágu hitastigi lengst af a.m.k. fyrir árstímann. Kortið til hægri gildir 3. okt kl. 18.

Og ekki er að sökum að spyrja; Grænlandshæðin sprettur upp eins og gorkúla við þessar aðstæður og mun eiga sinn þátt í viðhaldi ástandsins.

 

 

 

Athugasemdir

[Benedikt Jón (IP-tala skráð) 1.10.2008 kl. 09:09]

Einar, hvaðan kemur allt þetta kalda loft?  

Hvað varð om alheimshlýnunina "hræðilegu"? 

Hvernig getur svona mikill kuldi komið svona skyndilega og svo snemma hausts?

[Ari (IP-tala skráð) 1.10.2008 kl. 12:20]

tja ég veit það nú ekki, mig langar að skilgreina íslenskar veðurfar/árstíðir sem svo, með haustið í öndvegi:

Haust: U.þ.b. 7 mánuðir (dreifist ca. frá sept-jan & mars-maí)

Vetur: 2 mánuðir (ca. jan & feb)

Vor: 1 mánuður (kemur e-n tímann á tímabilinu maí-miðjúní)

Sumar: 2 mánuðir (ca. tímabilið miðjúní-júlí-miðágúst)

[Sigríður Jóna Mikaelsdóttir (IP-tala skráð) 1.10.2008 kl. 15:37]

Eitt sinn var mér kennt að haustið byrjar 23 sept vetur 6 nóv vor 21 maí sumar 6 júní

[Ómar Ragnarsson, 1.10.2008 kl. 16:48]

Ég hafði í hyggju að skoða nokkur fyrirbæri í norðausturríkjum Bandaríkjanna á heimleið frá Los Angeles og sé á Accuweather að kuldapollur norðan frá Kanada er að breiða sig suður yfir austurströndina langleiðina suður til Florida. Þeir segja að þetta sé 2-3 vikum fyrr en venjulega. Það haustar því víðar snemma að en á Íslandi, bæði í veðrinu og í fjármálunum.

[Ari (IP-tala skráð) 2.10.2008 kl. 00:41]

Eitt markvert. Það er mesta sólblettalægð í 50 ár! (þýðir það ekki kólnandi veður)

http://science.nasa.gov/headlines/y2008/30sep_blankyear.htm?list1078000