Veður sumardaginn fyrsta

Í minningunni álíta margir að veðrið sumardaginn fyrsta sé ævinlega fremur kalsasamt og allt annað en notarlegt að dvelja úti við uppá klæddur. Ef veður á landinu þennan dag síðustu árin er skoðað kemur í ljós að fara verður nokkur ár aftur til að finna almennilegt skítviðri þennan ágæta frídag okkar landsmanna.  Þannig sýnir veðurkortið fyrir sumadaginn fyrsta sem finna má á vef Veðurstofunnar að veðrið hafi t.a.m. leikið við okkur í fyrra 2005.

Árið 2004 var einnig fínasta veður um nánast allt land og mældist þá hitinn 11°C í Reykjavík á hádegi.  2003 var líka bærilegasta veður víðast hvar á landinu og rétt eins og í fyrra og hitteðfyrra ekki að sjá að úrkoma hafi verið að nokkru ráði á landinu.

2002 var veðrið hins vegar ekta, með frosti á norðanverðu landinu og ekki nema 3° hita í Reykjavík.

Svipað veður með N-kalsa árið 2000, en þarna á milli, þ.e. 2001 var sannkallað vorveður á landinu, heiðríkja á Akureyri og 7°C.

1999 þetta meðalveður þessa dags, en sólríkt á landinu öllu.

1998 mjög gott sunnanlands, líkast til besti sumardagurinn fyrsti ef svo má segja í Reykjavík í áraraðir, en þá var hitinn sem á júlídegi eða 13°C í hádeginu.

1997 var hálfgerður hragglandi og suðvestanlands gekk á með hagléljum, sem mér eru a.m.k. minnisstæð.

Sumardagurinn fyrsti var fremur svalur 1996 með éljaveðri á Vestfjörðum, en ári fyrr eða 1995 var veðrið hvað leiðinlegast þessi ár sem hér eru til skoðunar. Þá var raunverulega kalt á landinu. Norðan gjóla og hiti um og undir frostmarki á hádegi um mikinn hluta landsins.

Athygli vekur að síðustu 10 árin hið minnsta hefur ekki verið slagveðursrigning sumadaginn fyrsta í höfuðborginni og reyndar ekki síðan 1998 norðan- og austanlands svona heilt yfir. (2004 rigndi þó á Hornafirði pg víðar SA-lands).

Ef einhver hefur áhuga og tíma að þá væri fróðlegt að fá innsendar tilnefningar á versta og besta veðri á sumardaginn fyrsta, en kortasafnið á vef VÍ nær aftur til ársins 1949.  Til glöggvunar ber sumardaginn fyrsta ætíð upp á fyrsta fimmtudag eftir 19. apríl. Hér er tafla með réttum dögum úr fórum Þorsteins Sæmundssonar ritstjóra Almanaks HÍ.  

Spáin fyrir mogundaginn gerir ekki ráð fyrir sérlega vorlegu veðri eins og sjá má t.d. á veðurvef mbl.is. En það hefur vissulega oft verið síðra.

Athugasemdir

[Sigurður G. Tómasson, 19.4.2006 kl. 10:45]

Sæll Einar!
Ég er ekki viss um að síðustu 10 ár séu dæmigerð fyrir tímabilið. Ég held að þau séu bæði almennt miklu hlýrri en lengi hefur verið og það hafi leitt til annarra breytinga sem gerir það að verkum að þessi minning okkar Reykvíkinga um skítviðri sumardaginn fyrsta er alls engin bábilja, þótt hún hafi ekki reynst rétt upp á síðkastið.
Hér áður var það svo, að í meginatriðum var um að ræða þrenns konar veður í Reykjavík: Norðan eða NA þræsing með sólskini en frekar köldu veðri og hvössu vestan til í bænum þar sem skjóls frá Esjunni gætir ekki. Suðaustan rok og rigningu sem var fyrsti skammtur aðvífandi lægðar. Og í þriðja lagi, útsynning, ýmist með skúrum eða éljum. Á seinustu árum hefur margt verið með öðrum brag. Hitinn hefur verið hærri, sérstaklega að vorlagi. Lægðabrautir hafa verið á annan veg en áður. Hitastig sjávar hefur verið hærra umhverfis landið. Þetta hefur m.a. leitt til þess að við höfum fengið rigningu og súld í N-átt að vetrarlagi og þurviðri svo dægrum skiptir í S eða Sa austan átt á sumrin. En þetta eru nú bara leikmannsþankar. Sprottnir af því að þú varst að athuga veðrið sumardaginn fyrsta. Æskuminning mín um daginn breytist ekki. Skátar á stuttbuxum í norðangarra.
Bestu kveðjur, SGT