Haust í Nýja Englandi

Ég hef dvalið frá því fyrir helgi skammt frá New York borg í himnesku haustveðri.  Í þessum heimshluta eru skil á milli árstíða skýrari en við eigum að venjast.  Gestgjafar mínir segja að sumarhiti hafi ríkt fram undir mánðarmótin sept/okt, þá kólnað lítillega, en þessa síðustu daga orðið enn svalara og innfæddir dregið fram úlpurnar.

Í miðju laufskógabeltinu sem liggur þvert í gegn um N-Ameríku er haustlitadýrðin nánast ólýsanleg, en mest ber á hlyninum.  Lauf hans er þó ekki enn orðið alveg rautt á mínum slóðum, og sennilega ein til tvær vikur í það að haustlitadýrðin nái hámarki.  Hér er tengill á sniðugt "haustlitakort" fyrir Nýja England sem heimamenn geta notfært sér.  Lauftréin eru aðlöguð birtustýrð að mestu og því er lítill breytileiki í lauffallinu á milli ára. Með öðrum orðum hefur haustveðráttan lítið með tímasetningu haustlita og lauffalls að gera.

N-áttin sem hér hefur verið síðustu daga, líkist mjög þeirri sömu á Íslandi, þ.e. sunnanlands.  Loftið er þurrt og ekki ókunnuglegt.  Hér er hinsvegar landmassinn í norðri nánast óendalegur og fer kólnandi mjög hratt upp frá þessu.  Ef vindur stendur af landi í ríkjunum í norðaustri við landamæri Kanada má gera ráð fyrir alvöru vetrarveðráttu fljótlega í nóvember, en suðaustanvindurinn af Atlantshafinu ber hins mega með sér hlýtt og rakt loft, rétt eins og á sunnanverðu Íslandi.  En lengra nær samanburðurinn fyrri þessi tvö ólíku landsvæði ekki.   

Athugasemdir

[Inga í Boston (IP-tala skráð) 22.10.2008 kl. 16:47]

Haustin hér eru þau fallegustu sem ég hef séð á minni ævi og ávalt gott veður, þó að það sé nú ekki hægt að segja það sama um daginn í dag og hugsaði ég með mér hvort að við værum með þetta veður sem væri væntanlegt til ykkar á morgun, rigning og rok hér.  En á morgun er nýr dagur með sól en nú er samt farið að kólna hér.  Eitt sem Kananum þykir skrítið  og það er að það er virkilega kaldara hér en á Íslandi yfir vetratímann, allavega hér í Boston.

Kveðja frá Boston

Inga