Krassandi lægð stefnir beint á landið

Hún er mjög myndarleg lægðin sem dýpkar nú mjög suðvestur í hafi og virðist ætla að stefna beint á okkur á morgun, fimmtudag.  Kl. 18 er þrýstingi í miðju spáð undir 950 hPa eins og sjá má á meðfylgjandi spákorti  fengið af vef mbl.is (gildir 23. okt kl 18.)

Lægð þessi virðist ætla að koma æðandi með stefnu ca. á suðaustanvert landið og ganga síðan inn í sjálfa sig svo að segja yfir landinu rétt áður en hún nær fullri dýpt.  Þegar ferilinn er þessi verður veðrið ekki endileg verst í SA-áttinni áður en lægðin kemur upp að landinu heldur frekar í N eða V-áttum á meðan á hringsólinu við landið stendur.

Veðurfræðingarnir á vaktinni á Veðurstofunni eiga skiljanlega ekkert of auðvelt með að sjá fyrir nákvæma þróun fyrir, enda getur minniháttar frávik í spáðum ferli lægðarinnar haft afgerandi þýðingu fyrir veðrið.  Í athugasemd veðurfræðings er einfaldlega varað við óvissu, sem þýðir í raun að lítið getur verið að marka veðurspár nema til næstu klukkustundir í senn.

En hvernig sem öllu líður mun þessi lægð ekki bera með sér tiltakanlega hlýtt loft, það fer að mestu fram hjá fyrir austan land. Um leið og samskil lægðarinnar (með SA-áttinni) verða farin hjá verður því stutt í snjókomu og hríð.  

Athugasemdir

[Guðmundur Jakobsson (IP-tala skráð) 22.10.2008 kl. 15:20]

þetta eru góðar frétti fyrir okkur skíðamenn , nú í hallæri með ónýta krónu verðum við að nota brekkur á Íslandi .

kveðja

GJ

[Emil Hannes Valgeirsson, 22.10.2008 kl. 16:00]

Lægðin mun „ganga síðan inn í sjálfa sig“. Þetta hef ég ekki heyrt áður.

[willy (IP-tala skráð) 22.10.2008 kl. 16:20]

Einar,hvernig er útlitið hjá okkur í Vestmanneyjum?

[Gylfi Björgvinsson, 22.10.2008 kl. 21:14]

Talandi um skíðin og brekkurnar þá var það í eina tíð talin góð viðmið varðandi Bláfjöllin að það þurfi eina austan stórhríð og  aðra úr vestri og þá voru brekkurnar tilbúnar

[corvus corax, 23.10.2008 kl. 11:43]

Má þá segja að lægðin sé sjálfhverf ef hún hverfur inn í sjálfa sig? Það er frábært! Getur þetta ekki líka komið fyrir ríkisstjórnir?