Kaldur október

Nýliðinn októbermánuður er ekki aðeins tíðindamikill í sögu þjóðarinnar, heldur sker hann sig nokkuð úr veðurfarslega.  Hann var kaldur um land allt og sérstaklega var kalt síðari hluta mánaðarins. Eins snjóaði víðast í byggð  heldur fyrr en jafnan gerist. Ég hef ekki enn séð tölur frá Veðurstofunni, en í Reykjavík bendir allt til þess að ekki hafi verið kaldara í október frá því 1987.

Október 2008 er um (og jafnvel rúmlega) 1,5°C undir meðallagi.  Aðeins einn annar mánuður á þessu ári hefur verið undir meðallagi í höfuðborginni, en það var febrúar (-0,6°C í frávik).  Fara þarf allt aftur í febrúar 2002 til að finna mánuð sem sem var hlutfallslega kaldari en þessi nýliðni októbermánuður.

Sannast sagna eru flestir mánuðir þessi árin hlýrri samanborið við hið kalda meðaltal áranna 1961-1990.  En það kemur þó fyrir að einn og einn sé markvert kaldari en tölur þessa ára bera með sér. Nýliðinn mánuður er einn þeirra. 

Svo er bara að sjá hvaða stefnu hitafarið tekur í nóvember...

Athugasemdir

[Gunnar Th. Gunnarsson, 1.11.2008 kl. 23:32]

Er aldrei litið á meðaltal 1930-1990? Gefur það ekki raunhæfara meðaltal?

[Einar Sveinbjörnsson, 2.11.2008 kl. 09:34]

Sæll Gunnar !

Við fylgjum reglum sem WMO (Alþjóðaveðurfræðistofnunin) setur.  Þar er sagt fyrir um viðmiðunartímabilin sem taka við hvert af öðru.  Frá árinu 2021 verður miðað við 1991-2020.  Fyrri helmingur þessa tímabils eða til og með 2005 er markvert hlýrri hér á landi sem nemur um hálfri gráðu á ársvísu.

En það er rétt hjá þér að eðlilegra er að miða við raunhæft meðaltað og hlýskeiðið 1931-1960 jafnar vissulega út kalda tímabilið 1961-1990. En við fylgjum viðmiðum eins og aðrir.

ESv

[Sigurður Þór Guðjónsson, 2.11.2008 kl. 12:53]

Ég furða mig á að ekki er komið uppgjör fyrir október inn á vef Veðurstofunnar þó smáklausa hafi verið um það í Mogganum í gær. 

[Sigurður Þór Guðjónsson, 2.11.2008 kl. 12:56]

Já, svo finnst mér allt í lagi að menn leiki sér soldið með að bera saman við önnur meðaltöl en 1961-1990 þó það sé alþjóðleg viðmiðun. Eina meðaltlaið sem ég tek í rauninni mark á er hlýja meðaltalið 1931-1960. Ég get  ómögulega talið t.d. mánuð hlýjan, ef hann er vel undir því meðaltlai en aftur á móti vel yfir meðaltlalinu 1961-1990.   

[Gunnar Th. Gunnarsson, 2.11.2008 kl. 15:01]

Sammála Sigurður Þór, akkúrat það sem ég hugsaði

[Emil Hannes Valgeirsson, 2.11.2008 kl. 15:35]

Þótt rétt sé að fylgja viðmiðunarreglum þá ætti tímabilið 1931-1990 að gefa nokkuð rétta mynd því það inniheldur eitt hlýtt tímabil og eitt kalt. Mánuðir sem eru yfir því meðaltali hljóta að teljast hlýir.