Kistufellið í Esjunni skeinuhætt í N- og NNA-átt

Hann er vel þekktur staðurinn innarlega á Kjalarnesi, þar sem þjóðvegurinn (á leið vestur) kemur upp úr beygju í Kollafirðinum.  Sé hvöss N- eða NNA-átt standa hnútarnir ofan af Kistufellinu og þvert á veginn á tiltölulega stuttum kafla.  

Athyglisvert var að fylgjast með því í morgun hvernig þetta þróaðist.  Línuritin sem hér fylgja eru fengin frá Vegagerðinni og veðurstöðin er Kjalarnes sem staðsett er einmitt þar sem hviðurnar verða hvað mestar. Fyrir kl. 6 er lítið að gerast, en takið eftir því að þá var vindáttin vestan megin við N. Vissulega var þá hvasst í lofti, en í þeirri vindátt er skýlt undir Kistufelli.  Um leið og vindáttin snerist í N og NNA (bláa línan færist alveg niður) rétt upp úr kl. 6 gjörbreytist veðrið og í stað þess að hafa skjól er fjallið farið að magna upp vindinn, þar sem loftið steypist niður hlíðarnar. 

Sjá má að mesta hviðan hefur farið í 42 m/s um kl. 11, en strenginn ætti að sljákka strax upp úr hádegi. 

Athugasemdir

[Þorkell Guðbrandsson (IP-tala skráð) 27.11.2008 kl. 20:17]

Hef orðað það áður, en mikið væri nú fróðlegt ef þú gætir "analyserað" vindinn báðumegin á Snæfellsnesi, Einar! Það var athyglisvert að fylgjast með sírita Vegagerðarinnar á melunum sunnan við Hraunsmúla í dag. Svo þegar SA-áttin nær sér á strik, er það aftur að norðanverðu, sem vindarnir gerast snarpir þarna. Kolgrafafjörðurinn var illræmdur en nú eru þar fáir á ferð eftir að brúin kom, en það hvessir svo sem stundum illilega þar líka, þótt skárra sé en inni í botni.