Hálkan er ekkert grín

Á höfuðborgarsvæðinu liggur frá því í nótt klakabrynja yfir öllu og hálkan er eftir því.  Margir tóku einnig eftir því fyrr í morgun að bílarnir voru því sem næst þurrir á meðan jörðin var öll svelluð.

Í gærkvöldi nálgaðist lægðardrag úr norðvestri (sjá kort á miðnætti 1. des).  Frá því snjóaði í skamma stund.  Í SV og V-áttinni utan af hafinu var þess síðan skammt að bíða að það kæmi í þetta bloti.  Fljótlega gerði því slydduhraglanda og hitinn í Reykjavík komst í rúmar 2°C um miðnætti.  Um leið og dragið fór hjá með kuldaskilum kólnaði aftur og strax upp úr kl. 3 frysti á nýjan leik og krapinn á götunum hljóp í klakabrynju.  

Krapinn náði hins vegar að renna af bílnum í nótt þar sem hann bráðnaði ekki alveg. Bleytan sem eftir var hefur síðan náð að gufa upp að miklu leyti um leið og þurra N-áttin fór að leika um.  Krapinn var hins vegar meiri en svo á jörðinni að N-vindurinn næði að þurrka upp áður en allt fraus. 

Vegagerðin var viðbúin öllu og upp úr kl. 3 voru búið að ræsa út öll tiltæk tæki til hálkueyðingar á stofnbrautum. 

 

Athugasemdir

[Sigurður Hreiðar, 1.12.2008 kl. 13:41]

Fróðlegt, Einar, og ástæða til að vara oftar og meir við því sem t.d. fjandvinir okkar austur í Bretlandi kalla svartan ís -- en hálku af því tagi getur verið afar slæmt að varast.

En -- er munur á krapi og krapa? Eftir minni málvitund er hið síðara eftirréttur, sorbet á útlensku.

Góð kveðja