Fellibyljatíðin með líflegra móti þetta haustið á Atlantshafinu

Búið er að setja punktinn aftan við fellibyljatíðina í Atlantshafi, en opinberlega líkur henni 30. nóvember.  Samkvæmt skilgreiningu og talningu NOAA urðu hitabeltisstormarnir 16 talsins sem öðluðust þann styrk að hljóta nafn.  8 þeirra náðu styrk fellibyls og af þeim 5 sem voru álitnir meiriháttar fellibyljir að styrkleika 3 eða hærra á Saffir-Simpsons kvarðanum.  Þetta voru Bertha og Dolly og síðan Gustav, Hanna (náði vart landi) og Ike sem komu í röð og ollu margháttuðu tjóni á um tíu daga tímabili seint í ágúst og fyrst í september.

Bertha varð þess heiðurs aðnjótandi að verð langlífasti júlí-fellibylur frá upphafi skráninga.  Bertha hélt út í 17 daga og leifar hennar náðu meira að segja hingað um síðir.  Eitthvert skilgreint afkvæmi eða "horn" frá Ike náði líka hingað til lands og átti þátt í a.m.k. í mikilli úrkomu.

Vísindamenn við NOAA álíta að skýringar á líflegu tímabili séu tvíþættar.  Í fyrsta lagi sveiflast virkni Atlantshafsfellibylja með með nokkurra áratugasveiflu sem ekki er að fullu þekkt.  Í það minnsta hófst uppsveifla um 1995 og stendur hún enn.  Í öðru lagi var yfirborðshiti Atlantshafsins norðan miðbaugs hærri en venja er til, sem nam um 1/2 gráðu þær vikur sem fellibyljirnir urðu hvað kröftugastir.

Þetta haustið verður lengi í minni haft á Haítí og Kúbu þar sem tjónið varð verulegt, en Bandaríkin, Mexíkó og Mið-Ameríkuríkin sluppu mun betur að þessu sinni. 

Athugasemdir

[Þorkell Guðbrands (IP-tala skráð) 7.12.2008 kl. 09:38]

Ypsilon er andstyggilegur stafur. Ég kannaðist einu sinni við mann, sem ritaði það aldrei og rauna rritaði hann aldrei neitt, sem ekki heyrist í tali manna. Náði það jafnt til greinarmerkja og stórra stafa. Ég biðst fyrirfram afsökunar á nöldrinu, en fellibyljatímabili  lýkur - stofninn er í sögninni að ljúka og líklega kallast þetta -u- hljóðvarp. En sem einn af meðlimum í The Einar Sveinbjörnsson Fan Club þakka ég upplýsingarnar, sem eru náttúrulega aðal atriðið.